ՀՅԴ 135-ամյակին նվիրված հանդիսավոր արարողությանը ներկա էին տարբեր ոլորտների հայտնի գործիչներ։ Նրանց շարքում էին պրոդյուսեր, հասարակական գործիչ, Գյումրու ավագանու անդամ Ռուբեն Մխիթարյանը, քաղաքական գործիչ, քաղաքական վերլուծաբան, ԱԺ նախկին պատգամավոր Արման Աբովյանը, ռեժիսոր, մշակույթի վաստակավոր գործիչ, մուլտիպլիկատոր Դավիթ Սահակյանցը։
Ի՞նչ դերակատարություն ունի ՀՅԴ-ն հայ ժողովրդի պատմության վերջին 135 տարիներին հարցին հանրային գործիչները պատասխանեցին.
Ռուբեն Մխիթարյան. «Նախ, դաշնակցությանը մաղթում եմ նվազագույնը եւս 135 տարվա կյանք։ Դաշնակցության դերը անուրանալի է Հայաստանի Հանրապետության պատմության մեջ՝ սկսած ազգապահպանության, պետականության պահպանության անխտիր բոլոր պատերազմներին իրենց պարտադիր շատ մեծ մասնակցությամբ։ Եվ դա արյունով վաստակած իրավունք է՝ Հայաստանի Հանրապետությունում ունենալ կարեւորագույն դեր ու նշանակություն անցյալում, ներկայում եւ, իհարկե, նաեւ ապագայում»։
Կարդացեք նաև
Արման Աբովյան. «Միանում եմ գործընկերոջս խոսքերին։ Կարելի է շեշտել նաեւ, որ այո, իրականում դաշնակցության դերը դիմադրողականության ձեւավորման գործընթացի մեջ ուղղակի անգնահատելի է։ Դիմադրողականություն ասելով՝ նկատի ունեմ հայ ժողովրդի առնվազն վերջին 135 տարվա պատմությունը։ Բավական է հիշել համիդյան ժամանակներից՝ 1894 թվականից, մինչեւ Արցախյան պատերազմներ։ Այսինքն, այստեղ նույնիսկ քննարկելու թեմա չկա»։
Դավիթ Սահակյանց. «Տղաներն արդեն ամեն ինչ ասացին։ Միանշանակ միանում եմ ընկերներիս ասածներին։ Մի քանի անգամ հնչեց այսօրվա մի շատ կարեւոր թեզ, որ պայքարը շարունակական է։ Այդ ակնկալիքով եմ ես այստեղ։ Վստահ եմ, որ կլինի պայքար եւ այդ պայքարը կհաջողի»։
Աշոտ ՀԱԿՈԲՅԱՆ
