Aravot.am-ի տեղեկություններով, Շիրակի մարզի Անի խոշորացված համայնքի գյուղերից մեկի դպրոցի զինղեկը (անունը ազգանունը չենք հրապարկում՝ պահելով անմեղության կանխավարկածը) հայտնվել է իրավապահների ուշադրության կենտրոնում, քանի որ Անիի բաժնի համայնքային ոստիկանները օպերատիվ տվյալներ են ձեռք բերել, որ նա ապօրինի թմրանյութ է պահում ու օգտագործում։
Այս մասին զեկուցագիր է ներկայացրել Անիի բաժնի համայնքային ոստիկան Նիկոլյանը, որի հիման վրա զինղեկին հրավիրել են ոստիկանություն, որտեղ նա ազնվորեն խոստովանել է՝ ստացված տեղեկությունները համապատասխանում են իրականությանը։
Նա ոստիկաններին ասել է, որ իր տան պատշգամբում ունի իր կողմից պատրաստված «Կանեփ» տեսակի բույսից ու ներկի լուծիչի խառնուրդից ստացված «Խիմկա» տեսակի թմրամիջոց, և որ այն պահել է հետագայում անձամբ օգտագործելու համար։
Նա նաև ոստիկաններին բացատրել է, որ կանեփ տեսակի բույսը վայրաճ է, քաղել է հուլիս-օգոստոս ամիսներին իր տան հարակից դաշտամիջյան հատվածից։
Կարդացեք նաև
Շիրակի մարզի քննչական վարչության Արթիկի և Անիի քննչական բաժնում նախաձեռնվել է քրեական վարույթ՝ ՀՀ Քրեական օրենսգրքի 396-րդ հոդվածի 1-ին մասի հատկանիշներով։ Ուսուցչի տանը կատարվել է զննություն ու հայտնաբերվել է ընդհանուր 84․30 գրամ «խիմկա» տեսակի թմրամիջոց և «կանեփ» տեսակի բույսի ցողուններ։
Կատարվում է նախաքննություն։
