-Ակնհայտ է, որ Նիկոլ Փաշինյանը այդ ամենը իրականացնում է, քանի որ գտնվում է թուրք-ադրբեջանական տանդեմի պարտադրանքի ներքո: Մենք լսում ենք, թե ինչպես է Ադրբեջանի ղեկավարությունը տարբեր պահանջներ ներկայացնում ՀՀ նկատմամբ:
Ինքը իր այդ հայտարարությամբ եւս մեկ անգամ ե՛ւ արտաքին աշխարհին, ե՛ւ Ադրբեջանին ասում է՝ պատրաստ եմ փոխել Սահմանադրությունը, միայն թե խաղաղության պայմանագիրը լինի,- այսօր Aravot.am-ի հետ զրույցում ասաց Պաշտպանության նախկին նախարար Սեյրան Օհանյանը՝ անդրադառնալով Բեռլինում Նիկոլ Փաշինյանի հայտարարությանը, թե պատրաստ է Սահմանադրության փոփոխությունը նախաձեռնել անձամբ, եթե խաղաղության պայմանագիրը ստորագրելուց հետո պարզվի՝ այն չի համապատասխանում մեր գործող Սահմանադրությանը:
Կարդացեք նաև
Օհանյանի խոսքով՝ խաղաղություն կարող է լինել այն դեպքում, երբ երկու երկրներն ունեն որոշակի հավասար պայմաններ՝ հավասարակշռություն ե՛ւ քաղաքական, ե՛ւ մնացած բոլոր ոլորտներում. «Բայց մենք տեսնում ենք՝ Ադրբեջանի կողմից այդ նույն հռետորաբանությունը, պահանջները չեն փոխվում: Դրանք ունեն երկար շարան ու եթե ինչ-որ մի փաստաթուղթ էլ ստորագրվի, Սահմանադրությունն էլ փոխվի, այդ պահանջները շարունակական են լինելու »:
Արփինե ՍԻՄՈՆՅԱՆ
