Հայ գրոսմայստեր Լևոն Արոնյանը օրերս նվաճեց Freestyle Chess Grand Slam Final-ի տիտղոսը՝ 1,5:0,5 հաշվով պարտության մատնելով աշխարհի 16-րդ չեմպիոն, համաշխարհային դասակարգման առաջատար, նորվեգացի Մագնուս Կարլսենին։ Այս առիթով սոցիալական ցանցերում շատ տարբեր գրառումներ եղան։
ՀԱԿ փոխնախագահ Լևոն Զուրաբյանի ֆեյսբուքյան գրառումը
Լևոն Արոնյանը կարծես դառնում է ֆրիսթայլ (Ֆիշերի կամ նույնը` 960) շախմատի աշխարհի ոչ պաշտոնական չեմպիոնը:
Ինչ-որ իմաստով սա հարգանքի արժանի ավելի մեծ նվաճում է, քան դասական շախմատինը, որովհետև ֆրիսթայլ շախմատում կարող է լինել 960 պատահականորեն գեներացված սկզբնական դիրք, և այսպես կոչված «տեսական նախապատրաստությունը», այսինքն, պատմության ընթացքում խաղացած սկզբնախաղերն անգիր իմանալը որևէ դեր չի խաղում: Առավելություն են ստանում այն շախմատիստները, ովքեր ունեն տեղում դիրքի վերլուծության և հաշվարկի, ինչպես նաև իմպրովիզացիայի գերագույն կարողությունները:
Կարդացեք նաև
Այս առումով նվաճումը հատկապես տպավորիչ է, քանի որ այն ձեռք է բերվել եզրափակչում Մագնուս Կարլսենի նկատմամբ: Հատկապես տպավորիչ էր Թ:d4 քայլով սկսած գրոհը:
Լեւոն Արոնյան, կեցցե´ս:
Դառը շնորհավորանք նաեւ Հայաստանին, որի այսօրվա տգետ եւ ապաշնորհ ղեկավարները իրենց գործողություններով թուլացրին Հայաստանը բոլոր բնագավառներում, նաեւ շախմատում՝ դադարեցնելով պետական աջակցությունը մեր ազգային մեծագույն շախմատիստին, պարտադրելով նրան այդ աջակցությունը փնտրել Ամերիկայի Միացյալ Նահանգներում:
Մենք դեռ կվերադարձնենք Լեւոն Արոնյանին Հայաստան, ինչպես ընդհանրապես կվերադարձնենք Հայաստանին վստահությունն ու արժանապատվությունը:
«Միասնության թևեր» քաղաքական նախաձեռնության հիմնադիր ղեկավար, Իրավունքի և արդարության կենտրոն «Թաթոյան» հիմնադրամի տնօրեն, ՀՀ մարդու իրավունքների նախկին պաշտպան Արման Թաթոյանի ֆեյսբուքյան գրառումը
Լևոն Արոնյանի հաղթանակը մեծ ոգևորություն և հպարտություն պարգևեց բոլորիս։
Նրա նվաճումները տարիներ շարունակ մեզանից յուրաքանչյուրին, ամբողջ հայ ժողովրդին տալիս են հպարտանալու նոր առիթ՝ ապացուցելով մեր կարող և ստեղծարար ուժը։
Այս հաղթանակը ևս մեկ հնարավորություն է աշխարհին ներկայացնելու մեր տաղանդը, մտքի ճկունությունը և ոգու ամրությունը։ Յուրաքանչյուրիս սրտում խորը ակնածանք է ծնվում՝ գիտակցելով, որ մեր ժողովուրդը տարբեր ոլորտներում ունի հաղթանակած, բարձունքներ նվաճած հայրենակիցներ։
Լևոն ջան, շնորհավորում ենք: Թող այս հաջողությունները լինեն շարունակական, դառնան ներշնչանքի աղբյուր և ուժ տան մեզ նոր հաղթանակների ճանապարհին։
