ՌԴ ԱԳՆ պաշտոնյան խոսել է Հայաստանում Սամվել Կարապետյանի ձերբակալության հետևանքների մասին։
«Սամվել Կարապետյանի ձերբակալությունից հետո ռուս ձեռնարկատերերը զգուշավոր են դարձել Հայաստանում իրենց նախագծերի հեռանկարների հարցում», – ՌԻԱ Նովոստիին ասել է Ռուսաստանի արտաքին գործերի նախարարության ԱՊՀ երկրների չորրորդ դեպարտամենտի տնօրեն Միխայիլ Կալուգինը։
«Այս իրավիճակում այլ ռուս ձեռնարկատերեր զգուշավոր են դարձել Հայաստանում իրենց նախագծերի հեռանկարների գնահատման հարցում և կասկածի տակ են դնում ներդրումային միջավայրի կայունությունը, որը, հավանաբար, չի նպաստի երկկողմ առևտրի վերելքի պահպանմանը», – նշել է նա։
ՌԻԱ-ն հիշեցնում է. ««Տաշիր» խմբի սեփականատեր Սամվել Կարապետյանին մեղադրանք է առաջադրվել, և նա Հայաստանում ձերբակալվել է այն բանից հետո, երբ հայտարարել է Հայ Առաքելական Եկեղեցուն աջակցելու մասին՝ իշխանությունների կողմից հարձակումների ֆոնին։
Կարդացեք նաև
Գործարարն ինքը հերքել է մեղադրանքը և Հայաստանի ղեկավարությանը անգործունակ անվանել։
Եկեղեցուն Սամվել Կարապետյանի աջակցությունը զայրացրել է վարչապետ Նիկոլ Փաշինյանին, որը Ֆեյսբուքում մի քանի վիրավորական գրառումներ է արել եկեղեցու հոգևորականության և բարերարների դեմ։
Սամվել Կարապետյանը մեծ ներդրումներ է կատարում Հայաստանի զարգացման գործում։ «Տաշիր» հիմնադրամի հիմնական բարեգործական գործունեությունը ներառում է պատմական ժառանգության պահպանումն ու վերականգնումը, եկեղեցիների և տաճարների վերակառուցումը, ինչպես նաև առողջապահության և բժշկագիտության զարգացումը:
Բացի այդ, հիմնադրամի միջոցների մի մասն ուղղվում է մասսայական և երիտասարդական սպորտի աջակցությանը, մշակույթի և արվեստի զարգացմանը, սոցիալական ծրագրերի իրականացմանը և կարիքավորներին, այդ թվում՝ ցածր եկամուտ ունեցող ընտանիքներին և հաշմանդամներին օգնելուն:
Հիմնադրամը կառուցում և վերանորոգում է կրթական հաստատություններ և իրականացնում կրթական ծրագրեր»:
