Թումո ստեղծարար տեխնոլոգիաների կենտրոնը պաշտոնապես հայտարարում է Հայկական մշակութային ժառանգության ինստիտուտի մեկնարկը, ինչը կարևոր քայլ է հայկական ժառանգության փաստագրման, պահպանման և ստեղծագործական ակտիվացման համար։
Ինստիտուտը հիմնադրվել է Թումոյի գլխավոր տնօրեն Մարի Լու Փափազյանի կողմից` ձևավորվելով 2020 թվականին Թումոյի` Հայկական ժառանգության սկանավորման ծրագրից:
Ինստիտուտի նպատակն է հայկական ժառանգությունը վերածել ակտիվ և հասանելի ռեսուրսի ոչ միայն անցյալը պահպանելու, այլև մշակութային նոր արտահայտչաձևեր խրախուսելու համար։ Ինստիտուտը ղեկավարելու է Հյուլէ Քէշիշեանը։
Կարևոր ձեռքբերում է նաև նորաբաց Ինստիտուտի բաց հարթակը՝ armenianculturalheritageinstitute.org։
Կարդացեք նաև
Այսօրվանից հարթակը բաց է լայն հանրության առաջ։
Այստեղ հնարավոր է լիովին հասանելի եռաչափ մոդելների միջոցով ուսումնասիրել Հայաստանի և Արցախի ժառանգությունը, բացահայտել դրանց պատմությունները և մանրամասնորեն զննել յուրաքանչյուր դետալ՝ հետազոտության, կրթության և ստեղծագործական ոգեշնչման համար։
Եղվարդի Սուրբ Աստվածածին եկեղեցու եռաչափ մոդելը
Ժառանգության թվայնացմանն ուղղված աշխատանքներին զուգահեռ Ինստիտուտը ձևավորում է ժառանգության վերաբերյալ նախաձեռնությունների ընդգրկուն էկոհամակարգ. հավաքագրում է հուշարձանների և համայնքների հետ կապված բանավոր պատմությունները, գրանցում է ավանդույթները և պահպանում ձայնային և երաժշտական ժառանգությունը՝ միաժամանակ պատրաստելով ժառանգության հետ աշխատող հաջորդ սերնդին։
Եղեգնաձորի վիշապաքարի եռաչափ մոդելը
Ինստիտուտի առաքելությունն է ապահովել մշակութային հիշողության կենսունակությունը, արդիականությունը և հասանելիությունը արտահայտման նոր ձևերի համար։
Հայկական մշակութային ժառանգության ինստիտուտը նպատակ ունի վերամտածելու՝ ինչպես է ժառանգությունը պահպանվում և նոր շունչ ստանում և ապահովելու, որպեսզի ժառանգությունը հանդիսանա համընդհանուր ռեսուրս, մշակութային իրավունք և նոր ստեղծարարության հիմք:
Թումո ստեղծարար տեխնոլոգիաների կենտրոն
