Տեղեկատվական հասարակության համաշխարհային գագաթաժողովի արդյունքների իրագործման ընդհանուր վերանայման (WSIS+20) մասով բարձր մակարդակի հանդիպմանը ՄԱԿ-ում Հայաստանի Հանրապետության մշտական ներկայացուցիչ Պարույր Հովհաննիսյանն ընդգծեց միջազգային գործընկերության առանցքային դերը՝ տեխնոլոգիական արագընթաց վերափոխումների, այդ թվում՝ արհեստական բանականության զարգացման պայմաններում, միաժամանակ` նկատի առնելով տեղեկատվական ոլորտում առաջացող հնարավորություններն ու մարտահրավերները՝ առկա թվային բացերը լրացնելու և տեղեկատվական և հաղորդակցական տեխնոլոգիաներն ամրապնդելու համատեքստում։ Առանձնանշվեց արդար, խաղաղ և ներառական հասարակությունների խթանման, խաղաղության և անվտանգության, մարդու իրավունքների և կայուն զարգացման առաջմղման հանձնառությունը։
Իր ելույթում դեսպան Հովաննիսյանը նկատեց, որ լինելով բազմակողմ համագործակցության ջատագով` Հայաստանը արդեն մեկ տարի է, ինչ միացել է «Ազատություն առցանց կոալիցիային»՝ պաշտպանելու առցանց ազատությունը՝ փորձի փոխանակման և երկխոսության միջոցով:
2025թ. ապրիլից Հայաստանի Բարձր տեխնոլոգիական արդյունաբերության նախարարությունը ՅՈՒՆԻՍԵՖ-ի և «Իզմիրլյան» բարեգործական հիմնադրամի հետ համագործակցաբար, իրականացրել է երեխաների իրավունքների պաշտպանությանն ու թվային գրագիտության ու անվտանգության առաջմղմանն ուղղված նախաձեռնություններ` այդ թվում՝ ներկայացնելով «Երեխաների առցանց անվտանգության ճանապրհային քարտեզը»։
