Մայր Աթոռից Վաղարշապատի բժշկական կենտրոն տեղափոխված Բյուրականի հոգեւոր հովիվ Տեր Վրթանես քահանա Բաղալյանը այսօր սրտամկանի սուր ինֆարկտ է ստացել: Այս մասին Aravot.am-ին հայտնեց Վաղարշապատի բժշկական կենտրոնում գտնվող Տեր Ղեւոնդը:
Նա պատմեց, որ Վեհափառ հայրապետի հրահանգով փորձել են Տեր Վրթանեսին տեղափոխել Իզմիրլյան բժշկական կենտրոն, սակայն բժիշկներն ասել են, որ Տեր Վրթանեսին չի կարելի տեղափոխել:
«Իզմիրլյան բժշկական կենտրոնի գլխավոր բժիշկ Արմեն Չարչյանն էլ նոր զանգեց, ասաց՝ հեսա կհետաքրքրվի, հասկանա՝ ինչպես կարելի է տեղափոխումը կազմակերպել»:
Կարդացեք նաև
Տեր Ղեւոնդն ասաց, որ չի տեսել ու տեղյակ չէ՝ ինչ է նախորդել Տեր Վրթանեսի ինքնազգացողության վատացմանը:
Տեր Փառեն քահանա Առաքելյանն էլ մեզ հետ զրույցում հայտնեց, որ այս պահին Տեր Վրթանեսի վիճակը ծանր է. «Վիճակը թեթեւ չէ: Հիմա ստենտավորում են: Նրան տեղափոխել չի կարելի Երեւան: Վեհափառի վերահսկողության տակ է»:
Հիշեցնենք որ Տեր Վրթանեսի ինքնազգացողությունը վատացել է Մայր Աթոռում Վեհափառ հայրապետի հրաժարականի պահանջով իշխանության օրակարգին միացած 10 եպիսկոպոսների հրավիրած հավաքի ժամանակ: Նրան տեղում առաջին բուժօգնություն են ցուցաբերել «Շտապ օգնության» աշխատակիցներն ու հոսպիտալացրել:
Մայր Աթոռում ոստիկանապետ Արամ Ղազարյանի հետ հարցազրույցի ժամանակ վատացել է նաեւ լրագրող Անի Ներկարարյանի ինքնազգացողությունը: Նա ուշագնաց է եղել, նրան օգնություն են ցույց տվել ոստիկանները, տեղափոխել ոստիկանական մեքենա, մինչեւ լրագրողի զգացողությունը կարգավորվի:
Արփինե ՍԻՄՈՆՅԱՆ
