Ինչպես Ադրբեջանի տարածքով ղազախական ցորենի, այնպես էլ ադրբեջանական Socar-ի՝ բենզինով բեռնված 22 վագոններով գնացքի Հայաստան գալու մասին առաջինը տեղեկացրել է պաշտոնական Բաքուն՝ հրապարակելով դեպի Հայաստան ճանապարհ ընկած գնացքի կադրերը: Ավելի ուշ տեղեկությունը ֆեյսբուքյան գրառմամբ հաստատել էր նաեւ էկոնոմիկայի նախարար Գեւորգ Պապոյանը:
«Թերևս, սա ոչ միայն Հայաստանի եւ Ադրբեջանի միջեւ հաստատված խաղաղությունից հետո, այլեւ, առհասարակ, անկախությունից հետո Հայաստանի եւ Ադրբեջանի միջև առաջին առեւտրատնտեսական գործարքն է»,-գրել է նախարարը։
Aravot.am-ը էկոնոմիկայի նախարարության լրատվականից փորձեց պարզել, թե որ ընկերությունն է իրականացնում ադրբեջանական բենզինի ներկրումը Հայաստան: «Այս պահին ոչինչ չենք կարող ասել, մեր լրատվական վարչությունը դեռեւս տեղեկատվություն չունի: Տեսնենք՝ ինչ տեղեկատվություն կլինի, ըստ այդմ կտարածենք, եթե անհրաժեշտություն լինի»,-փոխանցեցին գերատեսչության լրատվականից:
Գոհար ՀԱԿՈԲՅԱՆ
