-Մեղադրանքը համարում եմ անհիմն, գտնում ենք, որ հենց այսօրվա նիստում պետք էր դադարեցնել հանրային քրեական հետապնդումը, սակայն դատարանը այլ որոշում կայացրեց: Հուսանք՝ հետագայում մեր պատկերացրած սցենարով ամեն ինչ կընթանա,- այսօր ՔՊ-ից հեռացված ԱԺ պատգամավոր Հովիկ Աղազարյանի գործով դատական նիստից հետո լրագրողներին ասաց պատգամավորի որդին՝ Հովսեփ Աղազարյանը:
Այսօրվա նիստում Աղազարյանի պաշտպանը՝ Աննա Ծառուկյանը, միջնորդեց Աղազարյանի քրեական հետապնդումը դադարեցնել, սակայն դատարանը մերժեց միջնորդությունը:
Անդրադառնալով հոր դեմ սկսած քրեական հետապնդումներից հետո իր աշխատանքից ազատվելու փաստին՝ Հովսեփ Աղազարյանն ասաց, որ իրեն չեն ստիպել ազատման դիմում գրել, կամավոր է գրել ու ազատվել:
Հիշեցնենք, որ Հովսեփ Աղազարյանն աշխատում էր Էկոնոմիկայի նախարարության գործերի կառավարման վարչությունում: Ավելի վաղ Հովիկ Աղազարյանի փաստաբանը մամուլին հայտնել էր, պատգամավորի որդուն նախարար Գևորգ Պապոյանն է հորդորել ազատման դիմում գրել:
Կարդացեք նաև
Հովսեփ Աղազարյանն ասաց, որ հոր հետ կատարվածից հետո ինքը ոչ միայն աշխատանքից է ազատման դիմում գրել, այլ ՔՊ-ից է դուրս եկել: Լրագրողի դիտարկմանը, թե հայրը շարունակում է աշխատել, ինքը դուրս եկավ, Հովսեփ Աղազարյանը շարունակեց. «Շարունակում է աշխատել, որովհետեւ մնաց իր դիրքերի վրա, չընկրկեց դժվարությունների առաջ, շարունակում է պահպանել իր կարգավիճակը»:
Հիշեցնենք, որ այսօր Աղազարյանի ենթադրյալ կաշառք ստանալու գործով առաջին դատական նիստն էր:
Արփինե ՍԻՄՈՆՅԱՆ
