«Առավոտի» նախորդ համարում տեղեկացրել էինք, որ Սահմանադրական դատարան է դիմել 1990-1995 թվականներին Գերագույն խորհրդի պատգամավոր, գործարար Մեխակ Գաբրիելյանը: Նա վիճարկել էր ՀՀ քրեական օրենսգրքի 59-րդ հոդվածում առկա բացթողումները, գտնելով, որ «քանի որ դրանով կարգավորված չէ դատական ակտով նշանակված տուգանքի վճարման վերաբերյալ իրավակարգավորումը սնանկ ճանաչված անձի դեպքում, այդ պատճառով էլ հակասություն է առաջանում Սահմանադրությամբ երաշխավորված՝ մարդու իրավունքների, ազատությունների եւ արժանապատվությունն ապահովող հոդվածների հետ»։ Նա խնդրել էր ՀՀ քրեական օրենսգրքի 59-րդ հոդվածը ճանաչել թերի՝ նշյալ խնդիրը չկարգավորված եւ վերացնել ՀՀ Սահմանադրության 23, 24, 61, 63 եւ 84 հոդվածներին հակասող այդ թերությունը;
Սակայն ՍԴ-ն իր ՍԴԴԿՈ–68 որոշմամբ մերժել էր նրա գործի քննությունը;
Մեխակ Գարրիելյանն արձագանքել է «Առավոտի» հրապարակմանը, ուղարկել երեք դատավորներին ուղղված իր հասցեական բողոքները։ Նրանք են ՍԴ դատավորներ Ս.Սաֆարյանը, Է.Շաթիրյանն ու Ե.Խունդկարյանը։
Երեքի բովանդակությունը նույնն էր. «Պարոն դատավոր/տիկին դատավոր, երբ ուղղել էր խոսքը Ս.Սաֆարյանին-Ռ.Մ./
Կարդացեք նաև
Ես այդպես էլ դատական համակարգից, այդ թվում եւ Սահմանադրական դատարանից, չստացա պատասխան, թե սնանկ մարդը ինչպես է վճարելու դատարանի կողմից նշանակված տուգանքը։
Դուք արդար չեք, դուք արդար մարդ չեք։
Աստված ասում է. «Սիրեցէ՛ք արդարութիւնը, երկրի՛ դատաւորներ». Իմաստութիւն Սողոմոնի 1.1:
Պարոն դատավոր, չնայած անաստված եք, բայց վախեցեք Աստծու պատժից՝ Աստծու դատաստանից, որը սովորաբար չի ուշանում։
Բայց Դուք փրկվելու ժամանակ ունեք, եթե այսուհետեւ չմեղանչեք եւ արդարությամբ գործեք։
Ես զգուշացրի եւ Աստծու առաջ մաքուր եմ»։
Հիշեցնեմ, որ Մ.Գաբրիելյանն իր դիմումում նշել էր, որ Վճռաբեկ դատարանը, մերժելով գործը վարույթ ընդունելը, փաստացի խուսափել է ներկայացված հարցի վերաբերյալ դիրքորոշում հայտնելուց. «Դրանով իսկ նշյալ իրավիճակների դեպքում նպաստելով Սահմանադրության մի շարք հոդվածներով մարդու իրավունքների պաշտպանությունն ապահովող պահանջների չկիրառմանը»
Ռուզան ՄԻՆԱՍՅԱՆ
«Առավոտ» օրաթերթ
20.12.2025
