«Փաստինֆո». 44-օրյա պատերազմում զոհված զինծառայողների ծնողներին «Եռաբլուր» զինվորական պանթեոնից ուժի կիրառմամբ բերման ենթարկելու գործով իրավապահները փակուղուց ելքեր այդպես էլ չեն գտել։ Գործը վերաբացելուց հետո շուրջ երկու տարի քնեցվեց նախաքննական մարմնում և կրկին որոշում կայացվեց՝ ոստիկանների նկատմամբ քրեական հետապնդում չհարուցվելու մասին։
Հիշեցնենք, որ 2022թ. սեպտեմբերի 21-ին՝ ՀՀ Անկախության օրը՝ վաղ առավոտյան ոստիկանության ծառայողներն անհամաչափ բռնի ուժի գործադրմամբ «Եռաբլուր»-ից բերման են ենթարկել 37 քաղաքացու՝ զոհված զինծառայողների ծնողներին, որոնք ցանկանում էին թույլ չտալ Նիկոլ Փաշինյանին՝ մուտք գործել պանթեոն՝ նշելով, որ նա է իրենց որդիների մահվան մեղավորը։
Ոստիկանությունից հայտնել են, որ նրանք բերման են ենթարկվել՝ Վարչական իրավախախտումների վերաբերյալ օրենսգրքի 182-րդ հոդվածի հիմքով՝ ոստիկանների օրինական պահանջը չկատարելու համար, թեեւ տեսանյութերում պարզ երեւում է, որ ոստիկանները որեւէ պահանջ չեն ներկայացրել, նախ ուժի գործադրմամբ բերման են ենթարկել հայրերին, ապա նաեւ՝ մայրերին։ Ոստիկանների գործողությունների հետևանքով զոհված զինծառայողների մայրերից մի քանիսը ստացել են տարբեր աստիճանի մարմնական վնասվածքներ, որը հետագայում հաստատվել է նաև դատաբժշկական փորձաքննության եզրակացությամբ։
Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 441-րդ հոդվածի 2-րդ մասի 1-ին կետի հատկանիշներով, այն է՝ պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որը կատարվել է բռնություն գործադրելով։ Քրեական գործը տևական ժամանակ «քնեցվեց», արդյունքում՝ դատախազությունը որոշում կայացրեց ոստիկանության ծառայողների նկատմամբ քրեական հետապնդում չհարուցելու մասին, ապա՝ գործի վարույթը կարճվեց։ Տուժող կողմը, սակայն, չի համաձայնել այս որոշումների հետ և վիճարկել է հիշյալ երկու որոշումները դատական կարգով։
Կարդացեք նաև
Հակակոռուպցիոն դատարանը 2024թ․ հունվարի 25-ին բավարարել է բողոքը՝ վերացնելով գլխավոր դատախազության կողմից կայացված՝ հանրային քրեական հետապնդում չհարուցելու մասին որոշումը, ինչը նշանակում է, որ քրեական վարույթը պետք է վերականգնվի, իրականացվի նոր նախաքննություն։ Վարույթն իրականացնող մարմինը պետք է վերացնի դատարանի կողմից արձանագրված մի շարք խախտումները, որոնք թույլ էր տրվել նախաքննության ընթացքում։
Մասնավորապես, դատարանն արձանագրել է, որ նախաքննական մարմնի կողմից 1 տարի 2 ամիս տևած նախաքննության ընթացքում չի պարզվել, թե ով է եղել այն անձը, որը հրահանգել է քաղաքացիներին հարկադրաբար հեռացնել «Եռաբլուր» զինվորական պանթեոնից, ոստիկանների ցուցմունքներում առկա մի շարք հակասությունները չեն պարզվել վարութային գործողությունների ընթացքում, գնահատական չի տրվել Վարչական դատարանի որոշումներին, որով արձանագրվել էր, որ քաղաքացիների կողմից չեն կատարվել վարչական իրավախախտումներ, ոստիկանության ծառայողների կողմից քաղաքացիներին ժամանակ չի տրամադրվել՝ ենթադրյալ խախտումները վերացնելու համար, հետևաբար, վարչական ձերբակալումն անօրինական է։ Դատարանի որոշման հիման վրա գործը վերաբացվել է, սակայն, ինչպես պարզվեց, նախաքննական մարմինն ավելի քան 1,5 տարի քննելու ընթացքում այդպես էլ նոր տվյալներ ձեռք չի բերվել, այսինքն՝ այն, ինչ դատարանները նշել են, որ պետք է կատարվի՝ չի կատարվել, կրկին որոշում է կայացվել՝ ոստիկանների նկատմամբ քրեական հետապնդում չհարուցելու։ Փաստաբան Վահան Հովհաննիսյանը «Փաստինֆո»-ի հետ զրույցում ասաց քրեական հետապնդում չհարուցելու որոշման դեմ բողոք է ներկայացվել Հակակոռուպցիոն դատարան։
«Հակակոռուպցիոն դատարանը որոշեց, որ այո, ոստիկանների նկատմամբ քրեական հետապնդում պետք է չհարուցվի, իմ բողոքը ենթակա է մերժման։ Այսինքն՝ նույն պայմաններում, նույն Հակակոռուպցիոն դատարանի մեկ դատավորը գտնում է, որ չպետք է կարճվի, մյուս դատավորը՝ 1,5 տարի անց՝ գտնում է, որ պետք է կարճվի»,- նշեց փաստաբանը՝ հավելելով, որ Հակակոռուպցիոն դատարանի որոշման դեմ վերաքննիչ բողոք է պատրաստվում ներկայացնել։
Իզաբել Սահակյան
