Սպիտակ տունը, հավատարիմ արտասովոր բովանդակությամբ հրապարակումներ պատրաստելու սովորությանը, սոցիալական հարթակներում տարածել է «Եթե չգիտեիք, հիմա գիտեք» վերտառությամբ եւ The Notorious B.I.G-ի Hypnotize ռեփ երգի ուղեկցությամբ տեսահոլովակ, որտեղ Վենեսուելայի նախագահ Նիկոլաս Մադուրոն ասում է՝ «Արի՛, տա՛ր ինձ։ Այստեղ՝ Միրաֆլորեսում, կսպասեմ քեզ։ Երկար սպասել չտա՛ս, վախկո՛տ»։
Այնուհետեւ, հատված է տեղադրված շաբաթ կեսօրին Ֆլորիդայում նախագահ Դոնալդ Թրամփի մամուլի ասուլիսից, որտեղ պետքարտուղար Մարկո Ռուբիոն ասում է՝ «Իսկ հիմա, եթե չգիտեիք, հիմա գիտեք»։
Հաջորդիվ տեսնում ենք արդեն գերեվարված նախագահ Մադուրոյի՝ ԱՄՆ ռազմական նավի վրա արված լուսանկարը, որտեղ նա ձեռնաշղթաներով է, իսկ աչքերը՝ կապված։
Հոլովակն ամփոփվում է Թրամփի դանդաղեցված քայլքով։
Կարդացեք նաև
Նախկինում փաստվել է, սակայն, որ 2024-ին ասված Մադուրոյի խոսքերն ուղղված են եղել ոչ թե Թրամփին, այլ ընդդիմության առաջնորդին։
Ավելի վաղ, Սպիտակ տունը մեկ այլ արտասովոր գրառում էր կատարել՝ Թրամփի սեւ եւ սպիտակ պատկերի տակ պատկերելով «FAFO» հապավումը, որը հայհոյախոսություն է եւ կրում է մոտավորապես հետեւյալ իմաստը՝ խաղեր խաղալու դեպքում արդյունքը ցավոտ կլինի։
Արսեն ԱՅՎԱԶՅԱՆ
