Հայաստանի ազգային ֆիլհարմոնիկ նվագախումբը (ՀԱՖՆ)՝ գեղարվեստական ղեկավար և գլխավոր դիրիժոր Էդուարդ Թոփչյանի ղեկավարությամբ, 2025թ. դեկտեմբերի 27-ից 2026թ.-ի հունվարի 7-ը, 9 համերգներով հանդես է եկել Չինաստանի այնպիսի կարևոր մշակութային կենտրոններում, ինչպիսիք են Չանշայի և Ցինդաոյի համերգասրահները, Ժուհայի, Լյաոյանի, Շենյանի, Ուհանի, Չանգշուի, Ցզիբոյի, Բաոցզիի, Վուքսիի մեծ թատրոնները:
Չինաստանի Ժողովրդական Հանրապետությունում կայացած ամանորյա մեծ շրջագայությունից հետո, Aravot.am-ի հարցմանն ի պատասխան, ՀԱՖՆ -ի գլխավոր պրոդյուսեր Արման Պադարյանը հայտնեց, որ շրջագայության ժամանակ ֆիլհարմոնիկի ընկերակցությամբ որպես մենակատարներ հանդես են եկել ճանաչված չինացի երաժիշտներ՝ կլարնետահար Տիան Շենը, սոպրանո Վու Բիքսիան, ինչպես նաեւ՝ ջութակահարուհի Անուշ Նիկողոսյանը:
Մեր զրուցակիցը տեղեկացրեց նաև «Արդեն երրորդ տարին է, որ նվագախումբը նման մասշտաբային հյուրախաղերով հանդես է գալիս Չինաստանում: Մեր ֆիլհարմոնիկն արդեն սիրված և սպասված նվագախումբ է Չինաստանում: Այնտեղ հանդես ենք եկել տոնական ծրագրով, իսկ համերգներին նախորդել են մեծ գովազդային արշավներ: Ի դեպ, մի քանի տասնամյակ է, ինչ դասական երաժշտության տարածման հարցում Չինաստանը լուրջ պետական ծրագիր է մշակել և հետևողականորեն իրականացնում է այն: Նշեմ, որ Հայաստանի ազգային ֆիլհարմոնիկի պարբերական հյուրախաղերը նաև այդ ծրագրի արդյունքն են, ինչը Չինաստանի և Հայաստանի միջև մշակութային կապերի ամրապնդմանն ուղղված արդյունավետ գոծունեություն է»:
Հավելեց նաև, թե նվագախումբը Չինաստանում մենակատարների հետ հնչեցրել է նաև չին կոմպոզիտորների ստեղծագործություններ: Հետո հատուկ շեշտեց. «Կազմակերպչական հարցերում չինացիները շատ վստահելի և պարտաճանաչ գործընկեր են: Ասեմ նաև, որ վերջին շրջանում ողջ երկրով մեկ կառուցվել են աննկարագրելի ներկայանալի համերգասրահներ՝ ֆանտաստիկ ակուստիկայով»:
Կարդացեք նաև
Հետաքրքրությանը, թե ինչ կոմպոզիտորների երկերով են հանդես եկել, Արման Պադարյանը նախ նշեց՝ ամանորի խորհրդանիշը հանդիսացող Շտրաուսների անունը, հետո՝ Բրամս, Ռոսինի, Գլինկա, Մոցարտ և ինչպես ենթադրում էինք՝ Խաչատրյան:
Սամվել ԴԱՆԻԵԼՅԱՆ
