«Սամվել Կարապետյանը պետության կողմից պոզիտիվ պարտականության կատարման բացակայության հետևանքով հայտնվել է վատ առողջական վիճակում»,-Սամվել Կարապետյանի փաստաբանական թիմի հրատապ մամուլի ասուլիսի ժամանակ կարծիք հայտնեց փաստաբան Լիաննա Գասպարյանը։
Նա ասաց, որ Սամվել Կարապետյանն ինքը չի դժգոհել իր առողջական վիճակից․ «Սակայն պաշտպանական կողմը մշտապես, հունիսի 23-ից սկսած պարբերաբար՝ երկու-երեք օրը մեկ, գրություն է հասցեագրել, որ ապահովեն Սամվել Կարապետյանի պատշաճ բժշկական օգնությունը։ Անձամբ եմ գրություն ներկայացրել, որ ժամանակային առումով ավելի սեղմ իրավիճակ ունենանք։ Քրեակատարողական բժշկության կենտրոնի աշխատակիցների հետ եմ խոսել, մասնագետների հետ եմ խոսել, որոնք ինձ վստահեցրել են, որ շատ արագ կազմակերպելու են այդ հետազոտությունը։ Յոթ ամիս անց մինչ օրս՝ մինչ խափանման միջոցի փոփոխությունը, որևէ հետազոտություն տեղի չի ունեցել։ Սա վկայում է այն մասին, որ բժշկական կենտրոնը ևս կառավարվում է մեկ կետից և չի կատարում այն պարտականությունները, որոնք դրված են իրենց վրա․ չի հոգում անձի կյանքի և առողջական վիճակի հետ կապված համապատասխան հարցերը։ Սամվել Կարապետյանին պատշաճ բուժօգնություն չցուցաբերելու պատճառով նա ունի առողջության վատթարացման վիճակ»։
Խոսելով խափանման միջոցի փոփոխության մասին՝ փաստաբանն ասաց․ «Խափանման միջոցի փոփոխությունը մեզ համար արդյունք չէ, հաջողություն չէ։ Դա համարում եմ՝ որպես այսպես ասած՝ չարիքի փոքրագույն այս պայմաններում»։
Կարդացեք նաև
Ասուլիսն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
