«Անտիֆեյքի» աշխատակազմն այսօր ի պաշտպանություն անազատության մեջ գտնվող «Իմնեմնիմի» փոդքասթի համահեղինակների բողոքի ցույցը շարունակեց ԵԽ գրասենյակի դիմաց:
-Նրանց կալանքը երկարաձգվեց եւս երեք ամսով: Ի սկզբանե այդ քրեական գործը շինծու էր ու քաղաքական հստակ նպատակադրումներով՝ լռեցնել Նարեկ Սամսոնյանին ու Վազգեն Սաղաթելյանին: Նրանք դասական քաղբանտարկյալներ են, որովհետեւ կալանավորվել են իրենց ազատ կամարտահայտության ու քաղաքական դիրքորոշման համար,- ԵԽ գրասենյակի առջեւ հայտարարեց «Անտիֆեյքի» լրագրող Դավիթ Ֆիդանյանը:
Նա նշեց, որ միջազգային կառույցները պարտավոր են ուշադրություն դարձնել ՀՀ-ում տեղի ունեցող խայտառակ բռնաճնշումներին. «Մասնավորապես այն փաստին, որ ՀՀ բանտերում նիկոլական իշխանության օրոք կալանավորված են մեդիադեմքեր, իսկ Նարեկ Սամսոնյանն այս պահին 6-րդ օրն է՝ գտնվում է հացադուլի մեջ: ԵԽ-ն եւ միջազգային կազմակերպությունները չպետք է լռեն ու խուլ ու համր ձեւանան ու չպետք է առաջնորդվեն աշխարհաքաղաքական առաջնահերթություններով: Շարունակելու ենք բախել ոչ միայն ԵԽ, այլեւ տարբեր միջազգային կառույցներին դռներ, դուրս գալ Երեւանի փողոցներ: Վստահ եմ՝ ԵԽ ներկայացուցիչները կամ միջազգային այլ կառույցների ներկայացուցիչները պատկերացնում են՝ ինչ է հացադուլը»:
Կարդացեք նաև
Ֆիդանյանը նաեւ նկատեց, որ 2018-ից առաջ, եթե պայմանական ասած՝ ՀՀ որեւէ ընդդիմադիր գործչի մազը ծռվում էր, միջազգային կառույցները այնպիսի աղմուկ էին բարձրացնում, կարծես ՀՀ-ում Իդի Ամինի ռեժիմն էր հաստատված, իսկ հիմա ճիշտ հակառակը՝ միայն լռում են:
Արփինե ՍԻՄՈՆՅԱՆ
