«6-7 ամիս մարդկանց կալանքի տակ պահելը վիրավորանք է, չէ՞։ Անպայման չէ, որ բառերը լինեն վիրավորական, գործողություններն էլ են վիրավորական։ Եթե սկսեմ վիրավորանքի դաշտից խոսել, ամենամեծ վիրավորանքն այն է եղել, որ ինձ՝ 30 տարի ծառայած մարդուն, կարող են մարդիկ ասել հանցագործ, ահաբեկիչ և նման այլ բաներ»,- «Բագրատ սրբազանի և մյուս 17 արդարների գործով» դատական նիստի ժամանակ այսպես արձագանքեց հանրային մեղադրողների միջնորդությանը Բագրատ սրբազանը։
Նշենք, որ այս գործով հանրային մեղադրողները, դիմելով նախագահող դատավոր Կարեն Ֆարխոյանին, ասացին․ «Դատավարության մասնակիցներն իրենց ելույթներում խոսում են քրեական գործի հետ առնչություն չունեցող փաստերի մասին, դրանք հաճախ վերաբերում են երրորդ անձանց՝ նրանց հասցեին հնչող վիրավորական արտահայտություններով, որոնք խաթարում են վարույթի ընթացքը։ Միջնորդում ենք, որ դատարանն անմիջապես ընդհատի դատավարության ցանկացած մասնակցի, երբ սկսում է սույն քրեական գործի հետ կապ չունեցող հայտարարություններ հնչեցնել և միջնորդում ենք վիրավորական արտահայտություններ հնչեցնելու դեպքում համապատասխան դատավարական ներգործության միջոցներ կիրառել»։
Բագրատ Սրբազանն այս առնչությամբ նշեց․ «Եթե մեր համբերությունն այդ գիծը չի հատում, չեմ կարծում՝ որևէ մեկն այս դատարանում իրավունք ունի դատարանին ասել՝ ինչպես վարվել։ Ուրեմն խոսքը ոչ թե դատարանին է ուղղված, այլ կոնկրետ ինձ։ Եթե տղամարդկության մասին արտահայտությունս ձեզ վիրավորել է, քանի որ մեր երկրում մի քիչ տկարացել է տղամարդկային բաժինը, եթե մարդիկ վատ են զգացել դրանից, ներողություն եմ խնդրում։ Առաջիկայում ավելի խիստ են լինելու հայտարարություններս նաև նրանց նկատմամբ, ովքեր սուտը կպաշտպանեն, կփորձեն ճշմարտության տեղ սուտը վաճառել, ինչպես նաև լինելով հանրային մեղադրողներ՝ հանրությանը կհամարեն առոչինչ։ Հետևաբար նորից եմ ասում՝ շարունակելու եմ նույն ձևով։ Պետք է մարդիկ պատասխան տան։ Դժվար է վեց ամիս շարունակ դիտել, թե ամեն գործակալ և այլք կարող են քեզ ինչ-որ բան ասել, երբ քո ձեռքերն ամբողջությամբ կապված են»։
Կարդացեք նաև
Դատական նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
