«Իրանի հայկական համայնքի հետ կապի մեջ ենք զուտ եկող մարդկանց շնորհիվ, անմիջական կապ չունենք։ Նույնիսկ դեսպանատան հետ երեկվա դրությամբ դեռ կապ չունեինք»,-կառավարության այսօրվա նիստից հետո լրագրողներին ասաց Սփյուռքի գործերի գլխավոր հանձնակատար Զարեհ Սինանյանը։
Հարցին, թե Իրանի հայերին Հայաստան տեղափոխելու հարցով ինչ-որ աշխատանք տանո՞ւմ են, Զարեհ Սինանյանը պատասխանեց․ «Այս վակուումի մեջ այդ հարցն անհնար է քննարկել, տեղում պետք է հասկանալ, թե ինչ է կատարվում»։
Ըստ նրա՝ հայերի մեծ հոսք չկա Իրանից, եկողներ կան, բայց ոչ հայեր։
Անդրադառնալով հարցին, թե քանի՞ զոհ կա հայերի շրջանում, Զարեհ Սինանյանը պատասխանեց․ «Մեկ զոհը հաստատված է, կարծեմ երրորդն էլ է հաստատված»։ Բայց չհերքեց, որ չհաստատված տվյալներով զոհերի թիվն ավելի մեծ է։
Կարդացեք նաև
Զարեհ Սինանյանը չկարողացավ պատասխանել հարցին՝ հայերի շրջանում ձերբակալություններ կա՞ն Իրանում։ «Ոչ մի տեղեկություն չկա, գիտենք, որ զոհեր կան»,- ասաց նա։
Սինանյանը վրդովվեց «Առավոտ»-ի հարցից, որ ստացվում է՝ հայկական կողմը չի կարողանում ապահովել Հայաստան տեղափոխվելու ցանկություն հայտնող իրանահայերի անվտանգ տեղափոխումը, անգամ ձերբակալությունների ու զոհերի մասին հստակ տեղեկություն չունեն։ «Ես ձեր հարցերին նորմալ պատասխանում եմ, թե Իրանում ինչ է տեղի ունենում, ձեր առաջ արդարանալու ինչ-որ բան չունեմ, հետեւաբար՝ չեմ պատասխանում ձեր հարցերին»,- ասաց նա։
Զարեհ Սինանյանին նաեւ հարց ուղղվեց, թե որքա՞ն պարգեւավճար է ստացել նախորդ տարեվերջին։ «Նույնը, ինչ բոլորը»,- պատասխանեց նա։ Սինանյանն ասաց, որ դա կառավարության որոշմամբ է եղել, իրենց աշխատանքն այդքան է գնահատվել։
Ռոզա ՀՈՎՀԱՆՆԻՍՅԱՆ
