Ռեժիսոր Նունե Աբրահամյանի բեմադրությունը՝ փոքրիկ տղայի մասին, ընդունվեց բուռն ծափերով
Ամանորյա տոներին 2 օր շարունակ Հակոբ Պարոնյանի անվան երաժշտական կոմեդիայի թատրոնում ավելի քան 2000 երեխա եւ գրեթե նույնքան մեծահասակ հնարավորություն ունեցան դիտելու «Հայասա» թատերախմբի «Իմ փետրավոր ընկերը» ներկայացումը:
Ռեժիսոր Նունե Աբրահամյանի բեմադրած պատմությունը փոքրիկ տղայի մասին էր, որը անհավասար վերաբերմունքի է արժանանում տարիքով ավելի մեծ եղբայրների ու քույրերի կողմից: Դրա համար էլ որոշում է փչացնել Սուրբ Ծննդյան տոնը, սակայն այդ գիշեր հանդիպում է իր փետրավոր ընկերոջը՝ փոքրիկ հրեշտակին, որը տղային օգնում է բացահայտել իրական բարության եւ ընկերության արժեքը:
Նրանք միասին անցնում են հետաքրքիր արկածներով լի ճանապարհ, հաղթահարում խոչընդոտները եւ սովորում գնահատել ընկերությունն ու վերափոխվել: Պատմության ավարտին տղան հասկանում է, որ ուրիշների ուրախությունն իր համար նույնչափ կարեւոր է, որքան սեփականը:
Ներկայացման մասսայական տեսարաններում ներգրավված էին «Էլենը եւ երեխաները» պարային թատրոն ստուդիայի սաները՝ գեղարվեստական ղեկավար Էլեն Գրիգորյանի ղեկավարությամբ:
«Իմ փետրավոր ընկերը» ներկայացումը դուր եկավ փոքրիկներին, դրա վկայությունն էին բուռն ծափերը եւ դահլիճից դժվարությամբ հեռանալը:
Միջոցառման ավարտին երեխաներին սպասում էին նվերներ, որոնք ամեն տարի հասնում են Հայաստան Ամերիկայի Հայ Ավետարանչական ընկերակցության (AMAA) ջանքերով, եւ տասնյակ կամավորների աջակցությամբ` փաթեթավորվում ՀԱԵ-ի նախաձեռնությամբ: AMAA-ն Հայաստանում 1991թ.-ից հայ երեխաների համար կազմակերպում է Ամանորի եւ Սուրբ Ծննդյան միջոցառումներ:
Պատրաստեց Գոհար ՀԱԿՈԲՅԱՆԸ
«Առավոտ» օրաթերթ
17.01.2026
