Արմավիրի մարզպետ Վահրամ Խաչատրյանը սոցցանցի իր էջում անդրադարձել էր «Պատիվ ունեմ» խմբակցության պատգամավոր, ՀՀԿ գործադիր մարմնի անդամ Տիգրան Աբրահամյանի հայտարարություններին. «Սերժը մի պատգամավոր ունի՝ Տիգրան Աբրահամյան անունով։
Սա եթերում լոպազացել է Արգիշտի Մեխակյանի մասով ու մտել է բունը։ Բնից դուրս արի, Տիգրա՛ն, հել դիմացներս, ինչքան շուտ հելնես, էդքան քո բաժին չափալախը շուտ կստանաս»։
Կոռուպցիայի կանխարգելման հանձնաժողովը որոշում է ընդունել վարույթ հարուցել այս գրառման առնչությամբ. «Հանձնաժողովը քննարկել է Վ. Խաչատրյանի կողմից կատարված արտահայտությունների և ամբողջ գրառման բովանդակությունը, ինչպես նաև մինչ նրա գրառումը Ազգային ժողովի պատգամավոր Տ. Աբրահամյանի վարքագիծը, որին հասցեագրվել էր Վ.Խաչատրյանի գրառումը։ Հանձնաժողովը գտել է, որ իրավաչափության տեսանկյունից խնդրահարույց է հանրային պաշտոն զբաղեցնող անձի կողմից այնպիսի խոսքի գործածումը, որը կարող է ողջամտորեն ընկալվել որպես առերևույթ բռնության սպառնալիք, անգամ եթե նման խոսքը կատարվել է քաղաքական բանավեճի համատեքստում։
Հանձնաժողովը կարևորել է այն հանգամանքը, որ Վ. Խաչատրյանը խնդրո առարկա արտահայտությունը («ինչքան շուտ հելնես՝ էտքան քո բաժին չափալախը շուտ կստանաս») կատարվել է գրավոր խոսքում, ուստի Վ.Խաչատրյանը հնարավորություն ուներ իր խոսքը վերաձևակերպելու այնպես, որ բացառվի դրա ողջամիտ ընկալումը՝ որպես բռնության սպառնալիք։
Կարդացեք նաև
Վերոգրյալից ելնելով՝ Հանձնաժողովը գտել է, որ գրառումը պարունակում է Կանոնագրքի 48-րդ կետի առերևույթ խախտում, և որոշել է նախաձեռնել վարույթ»։
