Ամենայն հայոց կաթողիկոսը հրավիրել է ՀԱԵ եպիսկոպոսաց ժողով Ավստրիայում: Որքան հասկանում եմ՝ Վեհափառը ցանկանում է խուսափել իրավիճակի հետագա լարումից ու հնարավոր բախումներից: Մինչդեռ Փաշինյանի նպատակը ճիշտ հակառակն է. ոչ միայն այս, այլ բոլոր մնացած քաղաքական հարցերում բորբոքել թշնամության, ատելության եւ հակառակության մթնոլորտը:
Դա հաշվի առնելով՝ Գարեգին Երկրորդի որոշումը ճիշտ է: Եթե եպիսկոպոսաց ժողովն անցկացվեր Էջմիածնում, ապա Փաշինյանն այդ օրերին այնտեղ կուղարկեր քաղաքացիական հագուստով ԱԱԾ-ականներին, սադրիչների, տեղական հեղինակություններին ենթարկվող թաղի խուժանին, քաղաքապետարանների, մարզպետարանների եւ այլ պետական հիմնարկների աշխատակիցներին՝ Մայր աթոռում խժդժություններ հրահրելու համար: Հնարավոր էին բռնություններ հոգեւորականների եւ հավատացյալների հանդեպ:
Ինչո՞ւ եմ ես դրանում վստահ: Որովհետեւ վերջին ամիսներին եկեղեցին, որպես ինստիտուտ, որպես նվիրապետական (հիերարխիկ) կառույց՝ ենթարկվում է իրենց վայրագությամբ աննախադեպ հարձակումների իշխանությունների կողմից: Դրա մասին շատ է գրվել: Բացի վարչական, ուժային, դատական ճնշումներից, ապօրինություններ են գործվում նաեւ, այսպես ասած, «հողի վրա»:
Թվարկեմ մի քանի հայտնի դեպք: Դեկտեմբերի 18-ին նիկոլական խուժանը տիրադավ եպիսկոպոսների գլխավորությամբ եւ ոստիկանության օգնությամբ ներխուժել էր Մայր Տաճար: Դեկտեմբերի 25-ին Գառնիում փաշինյանական «պատարագի» ժամանակ համայնքապետարանի աշխատակիցը կաթողիկոսին «քարով սատկացնելու» կոչ էր արել: Դեկտեմբերի 31-ին Թալինի Սուրբ Աստվածածին Եկեղեցում հոգեւորականների կողմից կատարվելիք «Նռնօրհնեքի» կարգը խոչընդոտվել է Թալինի համայնքապետի եւ նրա ենթակաների կողմից: Այդ գործողությունները, բնականաբար, չեն արժանացել իրավապահների ուշադրությանը, որովհետեւ իշխանությունը ոչ միայն խրախուսում է, այլ կազմակերպում է այդ ակնհայտ ապօրինությունները:
Կարդացեք նաև
Այս պայմաններում Էջմիածնում եպիսկոպոսաց ժողով հրավիրելը չափազանց ռիսկային կլիներ: Իսկ Ավստրիայի իրավապահներն ու դատարանները Փաշինյանի գրպանում չեն, նրանք, ենթադրում եմ, թույլ չեն տա իշխանական «դեսանտին», եթե նույնիսկ այդպիսին ուղարկվի, խժդժություններ կազմակերպել եւ կապահովեն ժողովի բնականոն ընթացքը:
Արամ ԱԲՐԱՀԱՄՅԱՆ
