«Առավոտը» արդեն բազմաթիվ օրինակներ է հրապարակել, թե ինչպես են իրավապահները վարույթներ նախաձեռնում սոցիալական ցանցերում իշխանության բարձրաստիճան գործիչների հասցեին սպառնալիքների առնչությամբ: Առայժմ հայտնի չէ որեւէ օրինակ, որ նման նախանձախնդրություն դրսեւորվեր նաեւ ընդդիմադիր գործիչների կամ լրագրողների հասցեին վիրավորական, զրպարտչական ու սպառնալից գրառումների վերաբերյալ:
Ահա եւս մի օրինակ. ՀՀ գլխավոր դատախազությունից հունվարի 20-ին ստացվել է ֆեյսբուքում ՌԴ-ի անձնագիր ունեցող մի հայ քաղաքացու կատարած գրառումը, որը «TRIPP ծրագրում ԱՄՆ-ի մասնաբաժինը մեծ է՝ խոշոր ներդրումների պատճառով․ Միրզոյան» խորագրով տեսանյութի ներքո գրել է. «Թուրքի շուն, կգա օր՝ տեսնեմ ոնց են քեզ կախում» մեկնաբանությունը:
«Այդ կերպ՝ տեղեկատվական կամ հաղորդակցական տեխնոլոգիաների օգտագործմամբ, իշխանության ներկայացուցչի նկատմամբ կատարել է բռնություն գործադրելու հրապարակային կոչ: Առերևույթ հանցանքի մասին հաղորդումը ուղարկվել է ՀՀ քննչական կոմիտե՝ քրեական վարույթ նախաձեռնելու հարցը որոշելու համար»,- նշել են իրավապահները:
