Aravot.am-ի տեղեկություններով, Չարենցավանի համայնքի ղեկավար Հակոբ Շահգալդյանը իրավապահ մարմիններին հաղորդում է տվել, որ Չարենցավան քաղաքի բնակիչ Արթուր Արսենյանը, «+Армяний+» տելեգրամյան լրատվական ալիքով հրապարակված տեսանյութով թշնամանք է հրահրել իր ու համայնքապետարանի ենթակայությամբ գործող այլ հիմնարկների պաշտոնատար անձանց նկատմամբ։
Ըստ Շահգալդյանի, Արթուր Արսենյանը համաձայն չլինելով «համայնքապետի եւ համայնքապետին ենթակայության ներքո գործող մյուս պաշտոնատար անձանց կողմից վարվող համայնքային քաղաքականության հետ, ունենալով տարբերվող քաղաքական հայացքներ եւ օգտագործելով լրատվական միջոցներն ու տեղեկատվական-հաղորդակցության տեխնոլոգիաները, հրապարակված տեսանյութով թշնամանք է հրահրում եւ քարոզում իր եւ մյուս պաշտոնյաների նկատմամբ, ինչպես նաեւ ավագանու անդամների նկատմամբ»։
Հակոբ Շահգալդյանը մասնավորապես նշել է, որ Արսենյանը տեսանյութով փորձում է ստեղծել անհանդուրժողական մթնոլորտ, ինչպես նաեւ ատելություն իր անձի նկատմամբ, պաշտոնից հեռացնելու նպատակով բռնության կոչեր է հնչեցրել։
Հրապարակային այդ կոչերն, ըստ հաղորդման, «ուղեկցվում են իրավական եւ բարոյական նորմերի նկատմամբ բացահայտ անհարգալից եւ ցինիկ վերաբերմունք ցուցաբերելով՝ օգտագործելով սեռական բնույթի հայհոյանքներ եւ լկտի բառապաշար»։
Կարդացեք նաև
Չարենցավանի համայնքապետ Հակոբ Շահգալդյանի հաղորդման հիման վրա կազմված փաստաթղթերն ուղարկվել են ՀՀ քննչական կոմիտեի Չարենցավանի քննչական բաժին։
