ԱՄՆ-ում գործող Միջին Արեւելքի ինստիտուտի ադրբեջանցի հետազոտող Ռաուֆ Մամմեդովի խոսքով՝ Ադրբեջանն իրեն ներկայացնում է որպես տարածաշրջանային ուժ, բայց չափից շատ ջանք է ներդնում՝ դա ներկայացնելու համար։ Մամմեդովը նշեց՝ տարածաշրջանային ուժ ներկայանալու համար անհրաժեշտ է տնտեսական ուժ։
«Հարավային Կովկասն՝ աշխարհաքաղաքական փոփոխության ներքո․ հակազդելով ճգնաժամերին եւ հավասարակշռելով hնարավորությունները» խորագրով պանելային քննարկման ժամանակ է այս մասին խոսել ադրբեջանցի փորձագետը։
Մամմեդովի գնահատմամբ՝ ադրբեջանական տնտեսության «պատկերն այդքան էլ լավը չէ»։ Ադրբեջանը նավթ արտահանող երկիր է, եւ պետության եկամուտների 70%-ից ավելին գոյանում է նավթի եւ գազի արտահանումից։ Մամմեդովը տարակուսում է՝ տնտեսությունը անկախության 35 տարիներին չի բազմազանեցվել։
Նա մտահոգությամբ արձանագրել է, որ Ադրբեջանի տնտեսության աճը կազմել է 0,8%, ինչը զիջում է թե՛ Հայաստանի, թե՛ Վրաստանի տնտեսական ցուցանիշերին։ Առկա տնտեսական աճը, նշում է Մամմեդովը, պայմանավորված է Ղարաբաղում Թուրքիայի նախագահ Ռեջեփ Թայիփ Էրդողանի հետ փոխկապակցվող ընկերությունների կողմից զարգացման, վերակառուցման եւ շինարարական ծրագրերի հետ։
Կարդացեք նաև
Իշխանությունները տնտեսական բացը փորձում են հարկերի ավելացմամբ եւ խոշոր տուգանքներով հատուցել, ինչին հետխորհրդային Ադրբեջանում սովոր չեն։
Փորձագետը փաստել է, որ պանելային քննարկման հայ մասնակից Տիգրան Գրիգորյանը կարող է խոսել Հայաստանի ներքին քաղաքականության մասին, մինչդեռ Ադրբեջանում ներքին քաղաքականություն գոյություն չունի։ Մամմեդովի խոսքով՝ այդ երկրում ամեն ինչ կախված է մեկ մարդու կամքից։
Քննարկումը՝ ստորեւ։
Արսեն ԱՅՎԱԶՅԱՆ
