How2B. Հայաստանում հեռահաղորդակցության երեք խոշոր օպերատորները՝ «Վիվա Արմենիան», «Յուքոմը» և «Թիմ Տելեկոմ Արմենիան», հայտարարել են վճարումների ընդունման գործընթացում սպասվող փոփոխությունների մասին։
2026 թվականի փետրվարի սկզբից այս ընկերությունների ծառայությունների դիմաց այլևս հնարավոր չի լինի վճարել հանրապետությունում ամենատարածված վճարահաշվարկային համակարգերի՝
- Idram-ի,
- Telcell-ի,
- EasyPay-ի միջոցով։
«Վիվա Արմենիայի» և «Թիմ Տելեկոմ Արմենիայի» պարագայում սահմանափակումներն ուժի մեջ են մտնում փետրվարի 1-ից, իսկ «Յուքոմի» դեպքում՝ փետրվարի 2-ից։ Բացի նշված համակարգերից, «Թիմ Տելեկոմ Արմենիան» դադարեցնում է համագործակցությունը նաև «Ֆասթ Շիֆթ»-ի հետ։
Այս որոշումների հիմքում ընկած է վճարահաշվարկային կազմակերպությունների հետ ծառայությունների մատուցման պայմանների շուրջ անհամաձայնությունը և փոխշահավետ համագործակցության եզրեր չգտնելը։ Օպերատորները նշում են, որ փոփոխությունները միտված են վճարային գործընթացների պարզեցմանը, դրամական գործարքների թվայնացմանը և սեփական էլեկտրոնային հարթակների զարգացմանը։
Կարդացեք նաև
Բաժանորդների համար շարունակում են գործել վճարման բազմաթիվ այլընտրանքային տարբերակներ, որոնց թվում են ընկերությունների սեփական բջջային հավելվածները՝ «My Viva», «My Ucom», «U!Pay», «My Team» և «Team Pay»։
Վճարումները կարելի է շարունակել իրականացնել նաև օպերատորների պաշտոնական կայքերում, սպասարկման կենտրոններում, «Հայփոստի» բաժանմունքներում, ինչպես նաև գործընկեր բանկերի հավելվածների, մասնաճյուղերի և տերմինալների միջոցով։ «Վիվա Արմենիան» լրացուցիչ հիշեցնում է նաև «Փողանցում» և «Լիցք+» ծառայությունների մասին, որոնք հնարավորություն են տալիս հաշվեկշիռը համալրել մտերիմների օգնությամբ կամ օգտվել կապից՝ վճարումը կատարելով ավելի ուշ։
