Առողջապահության նախարար Անահիտ Ավանեսյանն այսօր լրագրողների հետ ճեպազրույցում ասաց, որ չի այցելել օրերս Արցախից Հայաստան տեղափոխված անձանց։
«Այս պահին դրա կարիքը չի եղել, բայց կարծում եմ՝ կունենամ առիթ»,- նշեց նախարարը՝ հավելելով, որ նրանցից ոչ բոլորն են բուժհաստատություններում, քանի որ դրա կարիքը չկա։
«Դեռ մշտական դիտարկման ընթացքի մեջ են, անհրաժեշտ բուժօգնությունը տրամադրվում է պետության կողմից։ Նրանց առողջական վիճակի ամբողջ կազմակերպչական մասն այս պահին մենք իրականացնում ենք՝ ըստ կարիքի։ Վիճակը բավարար է, նրանք առաջին հետազոտման փուլն անցել են, արդեն հաջորդիվ կարիքները կբավարարվեն»,- հավելեց նախարարը։
Նա միաժամանակ տեղեկացրեց, որ գերությունից վերադարձած Վագիֆ Խաչատրյանի վիրահատությունը բարեհաջող է անցել, եւ նա հիմա վերականգնման փուլ է անցնում։
Կարդացեք նաև
Անահիտ Ավանեսյանն անդրադարձավ նաեւ կալանքի տակ գտնվող «Իմնեմնիմի» փոդքասթի համահեղինակ Նարեկ Սամսոնյանի առողջական վիճակին։ «Պարոն Սամսոնյանն իր անհրաժեշտ բուժօգնությունը ստանում է»,- նշեց նախարարը։
Ռոզա ՀՈՎՀԱՆՆԻՍՅԱՆ
