«Վերջապես ՊՆ-ն կայացրեց ռազմավարական բնույթի կարևորագույն, պատմական որոշում: Նրանք գտել են, որ Հայ Առաքելական Սուրբ Եկեղեցու կողմից տասնամյակներով մատուցված հոգևոր ծառայությունն ու քրիստոնեական դաստիարակություն այլևս պետք չէ Զինված ուժերին:
ԶՈւ ԳՇ բարոյահոգեբանական ապահովման վարչությունում Նիկոլի պահանջներին համապատասխան ՀԱՍԵ դեմ պայքարի նոր ծրագիր կմշակեն, ու ըստ այդմ ԶՈւ-ն, ամենայն հավանականությամբ, կունենա կարգալույծ եղած և/կամ Եկեղեցու հետ կապ չունեցող գնդերեցներ:
Շնորհավորում եմ, ևս մեկ քայլ՝ հանուն հայրենիքի: Աղդամը ձեզ չի մոռանա»,-Aravot.am-ի հետ զրույցում այսպես սարկազմով արձագանքեց ՀՀ պաշտպանության նախկին փոխնախարար Արտակ Զաքարյանը՝ պաշտպանության նախարար Սուրեն Պապիկյանի երեկվա որոշման հետ կապված։
Հիշեցնենք, Սուրեն Պապիկյանը երեկ հրամանագիր է ստորագրել` գնդերեցների գունդը լուծարելու մասին։
Կարդացեք նաև
Քաղաքագետ, «Մայր Հայաստան» կուսակցության քաղխորհրդի անդամ Ստեփան Դանիելյանի արձագանքն էլ կատարվածին այսպիսին է. «Կաթողիկոսին չեն կարողանում հանել, այսպիսի բաներ են անում՝ ցույց տալու համար, որ ինչ-որ գործընթաց է գնում: Ուղղակի վատություն են անում եկեղեցուն, կաթողիկոսին: Սա անձամբ Նիկոլի նախաձեռնությունն է, մյուսներն էլ ենթարկվում են»:
Հիշեցնենք, ՀՀ զինված ուժերի հոգևոր առաջնորդությունը հիմնադրվել է 1997 թ. նոյեմբերի 13-ին՝ երջանկահիշատակ Գարեգին Ա կաթողիկոսի և ՀՀ պաշտպանության նախարար լուսահոգի Վազգեն Սարգսյանի համատեղ նախաձեռնությամբ. 1997 թ. Մայր Աթոռ Սուրբ Էջմիածնի և ՀՀ պաշտպանության նախարարության միջև ստորագրվել է փոխհամաձայնության հուշագիր: Բանակի հոգևոր առաջնորդությունը սկզբնական շրջանում ստեղծվել է Հայոց բանակի սահմանապահ զորքերի, ինչպես նաև Լեռնային Ղարաբաղի Հանրապետության բանակի համար:
Ի դեպ, հրամանագրի տակ Նավասարդ արքեպիսկոպոս Կճոյանի ստորագրությունն է։
Նելլի ԳՐԻԳՈՐՅԱՆ
