Նաթան սրբազանի նկատմամբ նույնպես կիրառվեց խափանման միջոց՝ երկրից չբացակայելու արգելք։
Նա քիչ առաջ դուրս եկավ Քննչական կոմիտեից։ Սրբազանը հարցաքննվել է իբրեւ մեղադրյալ։ Նա նույնպես մեղադրվում է ՀՀ ՔՕ-ի 507 հոդվածով՝ «դատական ակտի կատարմանը խոչընդոտելու»։
Սրբազանի փաստաբանը հայտարարեց, որ մեղադրանքը պաշտպանական կողմի համար պարզ չէ։ Խափանման միջոցի հարցը բողոքարկվելու է։
Հարցին՝ Եպիսկոպոսաց ժողովը խանգարելու նպատա՞կ ունի այս ամենը, սրբազանը պատասխանեց․ «Չգիտեմ։ Ոչ մի մեկնաբանություն չեմ կարող անել, սիրելիներս»։
Կարդացեք նաև
Նա նաեւ հստակեցրեց, որ Գերագույն հոգեւոր խորհուրդը կարգալույծ անելու որոշում չի կայացրել, նման որոշում կայացնելը Կաթողիկոսի մենաշնորհն է․ «Եվ որեւէ մեկը չի կարող Ամենայն Հայոց Կաթողիկոսի նման տնօրինություններն ու որոշումները չեղարկի կամ միջամտի»։
Մասյացոտնի թեմի նախկին առաջնորդ Արման Սարոյանի պարագայում, Գերագույն հոգեւոր խորհուրդը Կաթողիկոսին առաջարկել է նման որոշում կայացնել։
Քիչ ուշ նաեւ փաստաբան Մարինե Ֆարմանյանը զրուցեց լրագրողների հետ։ Նա Վահան Սրբազանի փաստաբանն է։ Պարզ դարձավ, որ նրա նկատմամբ նույնպես խափանման միջոց է կիրառվել՝ բացակայելու արգելքը
Մուշեղ սրբազանի նկատմամբ ևս նույն խափանման միջոցն է կիրառվել։ Նրա պաշտպան Վրեժ Խաչիկյանը լրագրողներին փոխանցեց, որ վերջինս ի պաշտոնե եւ բարձր հոգեւորական ծառայության դիրքից ելնելով հաճախ է բացակայում եւ քանի որ նրան մեղսագրվող արարքն էլ ծանր հանցանք չէ, ուստի երկրից բացակայելու արգելք կարող էր չկիրառվել։
Փաստաբաններն ապօրինի են որակում իրենց պաշտպանյալներին մեղսագրվող արարքը եւ համարում են, որ սա պետության ուղիղ միջամտությունն է եկեղեցու գործերին, քանի որ ոչ մի քաղաքացիական կամ այլ մասնագիտացված դատարան չէր կարող միջանկյալ կամ վերջնական դատական ակտ կայացնել՝ դրանով լուծելով եկեղեցու ներքին կարգերին վերաբերվող հարցեր։
Խնդրո առարկան, հիշեցնենք, Մասյացոտնի թեմի նախկին առաջնորդ Արման Սարոյանի՝ թեմակալի պաշտոնից ազատումն է եւ կարգալույծ հռչակելը։
Հիշեցնենք, եպիսկոպոսներն առավոտից հրավիրվում են ՔԿ՝ հարցաքննության։ Նրանց միեւնույն մեղադրանքն է առաջադրվել։
Նելլի ԳՐԻԳՈՐՅԱՆ
