«Ապրելու երկիր» կուսակցության նախագահ Մանե Թանդիլյանի ֆեյսբուքյան գրառումը
Շնորհակալական նամակ եմ հղել Ֆրանսիայի Ազգային ժողովի նախագահ տիկին Յաել Բրաուն-Պիվեին՝ Ֆրանսիայի Ազգային ժողովի կողմից միաձայն ընդունված այն կարևոր բանաձևի համար, որով կոչ է արվում ազատ արձակել Ադրբեջանում պահվող հայ գերիներին։
Այս մարդասիրական և սկզբունքային դիրքորոշումը հերթական անգամ հաստատում է Ֆրանսիայի հավատարմությունը միջազգային իրավունքին, մարդու հիմնարար իրավունքների պաշտպանությանը և արդարությանը։
Այս որոշումը ոչ միայն հստակ քաղաքական ուղերձ է, այլև հույսի և աջակցության կարևոր ազդակ՝ հայ գերիների ընտանիքների և ողջ հայ ժողովրդի համար։
Բարձր ենք գնահատում Ֆրանսիայի Ազգային ժողովի հետևողական ու պատասխանատու մոտեցումն այն իրավիճակներում, երբ լռությունը կարող է վերածվել համակերպման։
