«Թմրամիջոցների ապօրինի շրջանառության դեպքերն աճել են 614-ով կամ 20,4 տոկոսով»,- ՆԳՆ կրթահամալիրում հրավիրված 2025-ի տարեկան ամփոփիչ մամուլի ասուլիսի ժամանակ հայտարարեց ՆԳ նախարար Արփինե Սարգսյանը:
Նաև նշեց՝ միևնույն ժամանակ հայտնաբերվել է թմրամիջոցների իրացման 243-ով ավելի դեպք․ «2025-ի կտրվածքով՝ ՀՀ իրավապահների կողմից առգրավվել է 768 կգ տարբեր տեսակի թմրամիջոցներ, ինչը 80 տոկոսով ավելին է նախորդ տարվա համեմատ։ Կարևոր նվաճում է․ ոչ թե գնացել ենք մանր չափաքանակի թմրամիջոցների հետևից, այլ ավելի խոշոր խմբաքանակների հետևից, արձանագրել ենք հիմնականում ներմուծման մասով՝ ավելի մեծ խմբաքանակի առգրավում»։
Արփինե Սարգսյանը հայտնեց, որ 2025-ին 2024-ի համեմատությամբ 3,2 տոկոսով նվազել է հանցագործությունների թիվը․ «Հրազենի գործադրմամբ կատարված հանցագործություններն աճել են 24 դեպքով, աճել են նաև նրանց բացահայտումների դեպքերը։ Ընդհանուր առմամբ ապօրինի հրազեն պահելու կասկածանքով ձերբակալվել է 115 անձ»։
Արփինե Սարգսյանը նաև հայտնեց, որ 5435 անձի 2025-ին զրկել են վարորդական վկայականից։
Կարդացեք նաև
Ասուլիսն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
