Ոստիկանության Երևան քաղաքի վարչության պարեկապահակակետային գնդի նախկին հրամանատար Ռոբերտ Մելքոնյանի և նրա նախկին տեղակալ Վալերի Օսիպյանի նկատմամբ որպես խափանման միջոց է կիրառվել բացակայելու արգելքը։ Այս մասին «Փաստինֆո»-ն տեղեկանում է Հակակոռուպցիոն կոմիտեից։
Հիշեցնենք, որ Վալերի Օսիպյանին և Ռոբերտ Մելքոնյանին մեղադրանք է ներկայացվել՝ «Մարտի 1»-ի գործով։ Հակակոռուպցիոն կոմիտեից ավելի վաղ, թեև անուններ չեն նշել, սակայն հայտնել են, որ 2008 թվականի մարտի 1-ին ոստիկանության տարբեր ստորաբաժանումների կողմից բռնության և հատուկ միջոցների գործադրմամբ Երևան քաղաքի «Ազատության» հրապարակում նստացույց անող խաղաղ ցուցարարներին ցրելու գործողությունները կազմակերպելու համար մեղադրանքներ են ներկայացվել նշված ժամանակահատվածում ՀՀ ոստիկանության Երևան քաղաքի վարչության պարեկապահակակետային գնդի հրամանատարի և նրա տեղակալի պաշտոնները զբաղեցրած անձանց։
Նշված ժամանակահատվածում այդ պաշտոնները զբաղեցնում էին Ռոբերտ Մելքոնյանը և Վալերի Օսիպյանը։ Վալերի Օսիպյանը, հիշեցնենք, 2018թ․ իշխանափոխությունից հետո նշանակվեց ՀՀ ոստիկանապետի պաշտոնում, ապա Փաշինյանի՝ 2019թ․ սեպտեմբերի 18-ի որոշմամբ նշանակվեց վարչապետի խորհրդական, օրեր անց ազատվեց պաշտոնից։
Իզաբել Սահակյան
