ТАСС-ին տված հարցազրույցում ՌԴ փոխարտգործնախարար Միխայիլ Գալուզինն ասել է․
«Օրերս Հայաստանի վարչապետ Նիկոլ Փաշինյանը հարցազրույցում նշել է, որ Հայաստանի քաղաքական գիծը չի ենթադրում վնաս հասցնել Ռուսաստանի շահերին։ Այնուամենայնիվ, մենք տեսնում ենք, որ Երևանը մեծացնում է արևմտյան երկրների և միավորումների հետ ռազմաքաղաքական և տնտեսական մերձեցման տեմպերը։ Բազմիցս մեր հայ գործընկերներին ասել ենք, որ Արևմուտքի համար՝ և դա այնտեղ արդեն չեն էլ թաքցնում, Հայաստանը հանդիսանում է աշխարհաքաղաքական պայքարի գործիք Մոսկվայի հետ դիմակայության գործում», – ասել է նա։
Գալուզինի խոսքով՝ Երևանում տեղյակ են Մոսկվայի սկզբունքային գնահատականներին՝ Եվրամիությանը անդամակցելու և Եվրասիական տնտեսական միության անդամակցության անհամատեղելիության վերաբերյալ։ Նա ընդգծել է, որ այլ ինտեգրացիոն միավորման կարգավորիչ դաշտ տեղափոխվելու դեպքում Երևանը չի կարողանա ապահովել ԵԱՏՄ նորմերի և կանոնների պահպանումը, ինչը կհանգեցնի համապատասխան հետևանքների։ «Հույս ունենք, որ հանրապետությունում կառաջնորդվեն պրագմատիզմով. հայկական տնտեսության աճի բարձր տեմպերը, ինֆլյացիայի ցածր մակարդակը, ամուր ազգային արժույթը, հայկական արտադրանքի համար լայն իրացման շուկան՝ այս ամենի հիմքը Ռուսաստանին և ԵԱՏՄ շրջանակներում համագործակցությունն է», — նշել է փոխնախարարը։
