Իշխանական թեզը՝ «մենք խաղաղություն բերողն ենք, եթե մեզ չընտրենք գալու է պատերազմ», «Դեմոկրատական այլընտրանք» կուսակցության նախագահ Սուրեն Սուրենյանցը համարում է ողորմելի։ Կուսակցության այսօր կայացած համագումարում, իր ելույթում նա ասաց․ «Բացեք իմ եւ Նիկոլ Փաշինյանի հարցազրույցները՝ մինչեւ 2020 թվականը եւ համեմատեք․ Նիկոլ Փաշինյանն ամբողջ օրն ասում էր՝ ոչ մի թիզ չպիտի հանձնենք, ով որ հող հանձնելուց է խոսում, այդ մարդկանց հողին պետք է հանձնենք, ոչ մի միլիմետր փոխզիջել չի կարելի։ Ես շարունակ ասում էի՝ հարցը պետք է լուծել փոխզիջումներով, որպեսզի նոր պատերազմը բացառվի։ Այս մարդը, որը բոլոր ոչմիթիզականներին «աբգոն» էր արել, իրեն ներկայացնում է խաղաղության գաղափարի կրող»։
Սուրենյանցը նաեւ հարց է տալիս՝ կարո՞ղ եք հիշել, Հայաստանում ո՞ր իշխանության օրոք է երեք պատերազմ եղել․ «Կարո՞ղ եք հիշել մի իշխանություն, որը պատերազմ է բերել, որի արդյունքում կորցրել ենք Արցախը։ Ինչ-որ չեմ հիշում, որ Լեւոն Տեր-Պետրոսյանի, Ռոբերտ Քոչարյանի եւ Սերժ Սարգսյանի իշխանության օրոք նման բան եղել է։ Ո՞վ բերեց պատերազմը, ո՞ւմ սեղանին էր դրված «Լավրովի պլան» կոչվող փաստաթուղթը։ Բա ընդունեիր այդ փաստաթուղթը, որը ապահովում էր Արցախի հայկականությունը։ Ազատագրված տարածքներից հինգ շրջան ետ էր վերադարձվում, Լաչինի եւ Քարվաճառի կարգավիճակն էլ փոխկապակցվում էր Արցախի ապագա կարգավիճակի հետ։ Քեզ միջնորդները բան են առաջարկում, ժողովրդից գաղտնի ես պահում, գնում ես Ստեփանակերտում հայտարարում ես՝ Արցախը Հայաստան է, եւ վերջ»։
Այսպիսով, ըստ բանախոսի, Նիկոլ Փաշինյանը արհամարհեց ԵԱՀԿ Մինսկի խմբի համանախագահ երեք միջուկային գերտերությունների ջանքերը, ՄԱԿ-ին եւ «կանաչ լույս» վառեց պատերազմի համար, որից հետո հաջորդ արկածախնդրությանը գնաց՝ հավատալով իր շուրջ «բուսած կեղծ արեւմտամետերին», որոնք իր ականջին շշնջացել էին, թե Ուկրաինայի պատերազմը սկսելուց հաջորդ ուրբաթ օրը «ՌԴ-ի պանիխիդան» է լինելու եւ երես թեքեց ՌԴ-ից, բանակցային գործընթացները տեղափոխելով արեւմտյան հարթակներ․ «Արեւմտյան հարթակում էլ կործանեց Արցախը»։
Սուրենյանցը հայտարարում է․ «Պատերազմ հրահրելու այլընտրանքը թուրքերի եւ ադրբեջանցիների առջեւ կզելը չէ։ Մենք խաղաղությանը դեմ չենք։ Ավելին ասեմ, եթե ձեւավորենք իշխանություն՝ անվերապահորեն կատարելու ենք Հայաստանի՝ միջազգայնորեն ստանձնած պարտավորությունները, անկախ նրանից, դրանք Հայաստանի շահերից բխում են, թե՝ ոչ, որովհետեւ մենք խուլիգան չենք, ոչ էլ արկածախնդիր, համ ել չենք ուզում 2018-2020 թվերի քաղաքականության նման մի բան վարենք եւ նոր պատերազմ գա մեր գլխին։ Եթե երկիրը ստանձնում է մի միջազգային պարտավորություն, այն պետք է կատարել․ այդ թվում՝ նոյեմբերի 9-ի եւ ԹՐԻՓՓ-ի ծրագրերը»։
Կարդացեք նաև
Նշյալ ծրագրերը բանախոսը համարում է կարգավորման ծրագրեր եւ անկախ դրանց որակից, կարծում է պետք է օգտագործենք դրանց ընձեռած հնարավորությունները՝ բանակցային գործընթացում Հայաստանի դիրքերն ամրապնդելու համար, այլ ոչ թե սուր ճոճենք ՌԴ-ի կամ ԱՄՆ-ի դեմ․ «Դու իսկի Ալիեւի առաջ թուր չես ճոճում, ինչ մի Պուտինի դեմ թուր ես ճոճում, թիմիդ հանձնարարում ես հակառուսական ստրիպտիզներ․․․ Վերջը՝ ո՞վ է վճարելու դրա գինը։ Արդեն մի հատ վճարեցինք՝ Արցախ։ Նիկոլ Փաշինյանի իշխանությունը պատերազմի հետ ամենաասոցացված իշխանությունն է։ Եթե ուզում եք խաղաղություն՝ ընտրեք ԲՀԿ-ին։ 2021 թվականին Նիկոլ Փաշինյանի վերընտրության գինը եղավ Արցախի կորուստը։ Հիմա, եթե ուզում եք կորցնենք Հայաստանը՝ գնացեք եւ ընտրեք Նիկոլ Փաշինյանին»։
Նելլի ԳՐԻԳՈՐՅԱՆ
