Սոֆիայում ընթացող բռնցքամարտի Ստրանջայի միջազգային մրցաշարում պայքարում մնացած Հայաստանի միակ մասնակիցը՝ 51 կգ քաշային Անուշ Գրիգորյանը, կիսաեզրափակիչ մենամարտում հանդիպեց տանտիրոջ կարգավիճակով հանդես եկող Զլատիսլավա Չուկանովային։ Եվրոպայի առաջնության նախկին բրոնզե մեդալակիր մեր մարզուհին երեք ռաունդում էլ ակնհայտորեն գերազանցեց մրցակցին թե ճիշտ ընտրած մարտավարությամբ, եւ թե դիպուկ հարվածներով։ Անգամ եղան պահեր, երբ ռեֆերին շատ հանգիստ կարող էր բուլղարուհուն հաշիվ բացել։ Ու ամենայն հավանականությամբ այդպես էլ կվարվեր, եթե վերջինը լիներ այլ երկրի ներկայացուցիչ։
Ինչեւէ, եզրափակիչ գոնգից հետո միավորներով հաղթանակը նվիրվեց Զլատիսլավային՝ 3։2, ինչին Անուշի մարտավկան՝ Հայաստանի կանանց ազգային հավաքականի գլխավոր մարզիչ Վազգեն Բադալյանը, հենց ռինգի ճոպանների մոտ հրապարակավ արտահայտեց իր անհամաձայնությունը։
Այդուհանդերձ, Անուշ Գրիգորյանը Հայաստանի միակ բռնցքամարտիկն է, որը Բուլղարիայում արժանացավ մրցանակային տեղի։
Աշոտ ՀԱԿՈԲՅԱՆ
