Արցախբանկի բաժնետոմսերի 43%-ը պատկանում է Արցախի ներդրումային հիմնադրամին, շուրջ 25 միլիարդ դրամի մասին է խոսքը։ Արցախցիների ամենամեծ խնդիրը եղել ու կա, դա բնակապահովման խնդիրն է։ Ձեզ մոտ հարց չի առաջանո՞ւմ, թե ինչու «Արցախբանկը» չմիացավ այդ ծրագրին։ Այս մասին ֆեյսբուքյան իր էջում հրապարակված տեսաուղերձում նշել է Արցախի պետնախարար Նժդեհ Իսկանդարյանը։
Պետնախարարի կարծիքով՝ «Արցախբանկը» կարող էր միանալ բնակապահովման ծրագրին և որոշակի արտոնություններ սահմանել զոհվածների, բազմազավակ, պայթյունի հետևանքով զոհվածների ու փոքր կազմ ունեցող ընտանիքների համար։
«Բայց «Արցախբանկը» չգնաց այդ քայլին։ Բալայան Արտակը խոսում է բարոյական արժեքների մասին։ Մարդ, որը երբևիցե որևէ ներդրում չի ունեցել մեր պետականության համար։ 2023թ. սեպտեմբերի 25-ին բենզինի պահեստի պայթյունից հետո մեր հայրենակիցներին ուղղաթիռներով տեղափոխում էին Հայաստան։ Բալայան Արտակը, օգտագործելով իր կապերը, իր հարազատներին այդ ուղղաթիռներով տեղափոխել է Հայաստան։ Չէ՞ որ նրանց փոխարեն կարող էին լինել վիրավոր անձինք, որոնք տեղափոխվելով այստեղ, միգուցե և փրկվեին։ Սա խոսում է այդ մարդու արժեհամակարգի մասին», – ասում է Իսկանդարյանը։
Արցախի պետնախարարը նշեց, որ առաջիկա օրերին սպասելու է արցախցիների արձագանքներին։
«Եթե լինի հանրային պահանջ, ապա մենք կորոշենք օրը ու ժամը և միասին կգնանք Բալայան Արտակից մեր հարցերի պատասխանները ստանալու»,- ասաց նա։
