Նոր արբանյակային լուսանկարները ցույց են տալիս, որ Իրանը խոցել է THAAD հակահրթիռային պաշտպանության համակարգի համար չափազանց արժեքավոր և հազվագյուտ երկու AN/TPY-2 ռադարը: Արևմտյան ռազմական մասնագետների կարծիքով՝ սա իսկական աղետ է։ Խոցված դիրքերը գտնվում էին Արաբական Միացյալ Էմիրություններում և Հորդանանում։
AN/TPY-2 ռադարները THAAD համակարգի ամենակարևոր բաղադրիչն են, քանի որ հենց դրանք են հայտնաբերում թիրախները, ուղեկցում դրանք, տարբերում կեղծ թիրախները իրականներից և ուղղորդում THAAD հակահրթիռները։
Բաց աղբյուրների տվյալներով՝ AN/TPY-2 ռադարը սպառում է մոտ 2 ՄՎտ էներգիա, ունի մոտ 9.2 մ² մակերես, կառուցված է GaN (գալիումի նիտրիդ) տեխնոլոգիայով և աշխատում է X տիրույթում (8.55–10 ԳՀց)։ Հայտարարված հայտնաբերման հեռավորությունը շուրջ 1000 կմ է, իսկ որոշ աղբյուրների համաձայն՝ նույնիսկ ավելի քան 2000 կմ։ Յուրաքանչյուր THAAD համալիրում կա ընդամենը մեկ նման ռադար։
Կարդացեք նաև
Այս համակարգերը արտադրվում են շատ փոքր քանակով․ 1990-ականներից ի վեր կարող էր արտադրված լինել մոտ 20 միավոր։ Դրանց արժեքը չափազանց բարձր է՝ 500 միլիոնից մինչև 1 միլիարդ դոլար։ Այսինքն՝ եթե իսկապես չորս օրվա ընթացքում կորցվել է երկու նման ռադար, դրանց փոխարինումը կպահանջի տարիներ և հարյուրավոր միլիոններ։ Բացի այդ, տարածաշրջան պետք է տեղափոխվի առնվազն ևս մեկ AN/TPY-2 ռադար, որը պետք է հանվի այլ ուղղությունից։ Պահեստային համակարգեր պարզապես չկան, և արագ տեղափոխման ժամանակ նույնպես չկա։ Սա նշանակում է, որ Իրանի համար կարող է բացվել որոշակի հնարավորությունների «պատուհան»։
Բացի երկու THAAD համալիրների կորուստից, AN/TPY-2 ռադարների ոչնչացումը նաև թուլացնում է ընդհանուր իրավիճակային իրազեկությունը Patriot ԶՀՀ-ների և Aegis նավային համակարգերի համար՝ SM-3 հրթիռներով, քանի որ օդային թիրախների մասին տվյալները փոխանցվում էին ընդհանուր տվյալների փոխանակման ցանց։
Դեռ հայտնի չէ՝ ռադարներին հարվածել են «Շահեդ» ԱԹՍ-ները, թե բալիստիկ հրթիռները։ Եթե երկրորդ տարբերակն է, ապա դա առավել տհաճ կլինի այն համակարգի համար, որը նույնիսկ ինքն իրեն պաշտպանել չի կարողացել։ Բացի այդ, սովորաբար այդ ռադարների մոտ տեղակայվում է Patriot մարտկոց, որը նույնպես չի կարողացել կանխել հարվածը։
ՀԵՆԱԿԵՏ
