Վարչապետ Նիկոլ Փաշինյանն այսօր իր թիմակիցներով Արագածոտնի մարզում էր: Աշտարակի «պոպոք» ուտելով՝ վարչապետը աջ ու ձախ բարեւում էր քաղաքացիներին, հիշեցնում Աշտարակի «պոպոքի» հայտնի երգը: Հետո սկսեց բռի մեջ լիքը լցրած «պոպոքից» հյուրասիրել թիմակիցներին:
Երբ Աշտարակի մի բնակիչ մոտեցավ, որ ինքն էլ հյուրասիրվի, վարչապետը դիտողություն արեց՝ ասելով, «դուք ուտում եք, ունեք, թող երեւանցիները ուտեն»:
Հետո խանութում հանդիպեց արցախցի մի կնոջ, ասաց՝ «վաղը մարտի ութն է, գոնե սենց շնորհավորենք» ու արցախցի կնոջ գնումները տոպրակով նրա ձեռքից վերցրեց ու անձամբ տարավ մինչեւ նրա տուն:
Ճանապարհին մեկ այլ տարեց տղամարդու բանկային քարտերը ստուգեց՝ պարզեց՝ ինչպես է թոշակը ստանում, համոզեց, որ ապրիլի մեկից ստացվում է, որ 45.000 դրամով նրա թոշակը բարձրացած կարելի է համարել: Հրաժեշտ տալիս էլ բարեւներ ուղարկեց այդ տղամարդու կնոջը:
Կարդացեք նաև
Մեկ այլ տարեց տղամարդ էլ բարեւին ի պատասխան ասաց՝ երկրի վիճակը լավ չի:
-Արի բացատրի՝ ինչի լավ չի,- հարցրեց Փաշինյանը:
-Գործ չկա,- դժգոհեց քաղաքացին:
-Ի՞նչ մասնագիտություն ունես,- հարցրեց Փաշինյանը:
– Բանվոր եմ,-արձագանքեց 60 ամյա տղամարդը:
– Բանվորի աշխատանք չկա՞, հաստա՞տ,- զարմացավ Փաշինյանը:
Մարզպետն ու Աշտարակի համայնքապետն էլ միանգամից հաստատեցին՝ 50 հոգու բանվորի ազատ տեղ ունեն:
-Շնորհակալ եմ,-պատասխանեց 60 ամյա տղամարդը:
-Շնորհակալը, շնորհակալ, դե մտի, աշխատի էլի եղբայր,- արձագանքեց Փաշինյանն ու քայլեց առաջ:
-Ուրիշ ի՞նչ խնդիր կա, ասա լուծենք,- արդեն հեռանալիս տարեց տղամարդուն ասաց Փաշինյանը:
Մանրամասները՝ տեսանյութում
Արփինե ՍԻՄՈՆՅԱՆ
