Իրանի հայերն այս փուլում տարհանման հարց չեն բարձրացնում։ Այս մասին «Առավոտ»-ի հետ զրույցում ասաց Թեհրանում լույս տեսնող «Արաքս» պարբերականի գլխավոր խմբագիր Մովսես Քեշիշյանը՝ անդրադառնալով Իրանում տիրող իրավիճակին։
«Սարսափն այն աստիճանի չի հասել, որ մարդիկ տեղափոխվեն, տեղափոխվելու հարց բարձրացնեն։ Բայց ինչպես Իրանի ամբողջ բնակչության, այնպես էլ հայերի մոտ մտահոգություններ կան, մտահոգված են այս իրավիճակով։ Եթե մինչեւ հիմա ամերիկա-իսրայելյան կոալիցիան փորձում էր հարվածի տակ առնել պետական կամ ռազմական կառույցները, հիմա փորձում են ենթակառուցվածքներին եւ բնակելի շենքերին հարվածել, ինչը մտահոգիչ է։ Հայտնի է, որ գնում են դեպի նրան, որպեսզի հնարավորինս շատ ճնշեն Իրանին, դա մտահոգություն է առաջացնում բնակչության մոտ»,- ասաց Մովսես Քեշիշյանը։
Ըստ նրա՝ դժվար թե առաջիկայում հայ համայնքի տարհանման խնդիր առաջանա․ «Իրանը մեծ ու հզոր երկիր է, դժվար թե հարվածներն այնքան ուժգնանան, որ մարդկանց մոտ տագնապ առաջանա»։
Ավելի վաղ տեղեկացրել էինք, որ ՀՀ պետական գերատեսչությունները խնդիր են համարում իրանահայ համայնքի հետ կապ հաստատելը։ Քեշիշյանի խոսքով՝ Իրանում արտաքին աշխարհի հետ ինտերնետ կապը չի գործում, միայն ներքին ինտերնետ ծառայությունն է գործում։ Այն, որ հայ համայնքի հետ Հայաստանից դժվար է կապ հաստատել, ըստ Քեշիշյանի, պայմանավորված է նրանով, որ Իրանից դուրս զանգեր անել հնարավոր է, բայց Իրանի հետ կապ հաստատելը դժվար է։
Կարդացեք նաև
Ռոզա ՀՈՎՀԱՆՆԻՍՅԱՆ
