«Նման բաներով մեզ մեր մեծ պայքարից հետ պահել ոչ մեկը չի կարող՝ Նիկոլը կլինի, ով ուզում է՝ լինի, մինչև չունենանք ուժեղ Հայաստան»,- Հակակոռուպցիոն դատարանի բակում լրագրողների հետ զրույցում ասաց «Մեր ձևով» շարժման համակարգող խորհրդի անդամ Ալեքսան Ալեքսանյանը՝ անդրադառնալով Սամվել Կարապետյանի աջակիցների ձերբակալություններին։
Նշենք, որ «Մեր ձևով» շարժման մամուլի խոսնակ Մարիաննա Ղահրամանյանը հայտնել էր․ «Սամվել Կարապետյանի աջակիցների շրջանում կան բերման ենթարկվածներ։ Հակակոռուպցիոն դատարանի առաջ խաղաղ սատարման ակցիայի մասնակիցները անհասկանալի պատճառով բերման են ենթարկել։ Մարդկանց թույլ չեն տվել լուսացույցի հատվածով անցնել, ընդամենը փողոցը անցնելու պատճառով կան բերման ենթարկվածներ»։
Ինչպես արդեն տեղեկացրել ենք, այս պահին դատարանը քննում է Քննչական կոմիտեի միջնորդությունը՝ մեկ ամսով երկարաձգել Սամվել Կարապետյանի տնային կալանքը։
Կարդացեք նաև
Նշենք, որ ըստ տեղեկությունների՝ դատարանի բակում ի աջակցություն Սամվել Կարապետյանի կազմակերպված հավաքի վայրից 10-25 հոգի բերման է ենթարկվել։
Այս առիթով Ալեքսան Ալեքսանյանը պարզաբանեց․ «Բոլորը՝ ոստիկանությունից սկսած, տեսել են, որ մեր կողմից որևէ բացասական բան, լարվածության ստեղծման միտում ու ցանկություն չկա ու չի էլ լինի։ Մենք մեր տեղում ամուր կանգնած ենք միշտ։ Այսօր բոլորս հավաքվել ենք, տասնյակ հազարավոր հայրենակիցներ են իմացել, որ Սամվել Կարապետյանի ապօրինի կալանքի դատավարությունն է ընթանում, դեռ մարդիկ գալիս են։ Ու եթե փոքրիկ սադրիչների պատճառով ինչ-որ մարդիկ ձերբակալվել են, իրավաբանները կզբաղվեն, ամեն ինչ նորմալ կլինի»։
Հակակոռուպցիոն դատարանի բակից ուղիղ եթերն ամբողջությամբ՝ տեսանյութում
Տաթև ՀԱՐՈՒԹՈՒՆՅԱՆ
Հ․Գ․ ՆԳՆ-ի տարածած հաղորդագրության համաձայն՝ «Սամվել Կարապետյանի հավաքի մասնակից 3 անձ ձերբակալվել և տեղափոխվել է ոստիկանության տարածքային ստորաբաժանում»։
