Ամերիկյան ազդեցիկ Intelligence Online կայքը Մեթ Բեռնարդինիի (Matt Bernardini) հեղինակությամբ դեռևս հունվարի 22-ին (2026 թ.) հրապարակել է հոդված՝ Armenian opposition steps up US lobbying amid crackdown in Yerevan, Հայաստանում ահագնացող մարդու իրավունքների խախտումների վերաբերյալ։
Հոդվածի հայերեն համառոտագրությունը.
Հայաստանի արևմտամետ Ազգային-ժողովրդավարական Բևեռը, նպատակ ունենալով ամրապնդել ժողովրդավարական հաստատությունները Հայաստանում, շարունակում է իր լոբբիստական գործունեությունը Միացյալ Նահանգներում։ ԱԺԲ-ն ահազանգում է Հայաստանում մարդու իրավունքների խախտումների` հատկապես Հայաստանյայց առաքելական սուրբ եկեղեցու (ՀԱՍԵ) նկատմամբ հարձակումների սաստկացման, ազատ խոսքի սահմանափակման և առաջիկա ընտրությունների հնարավոր կեղծման վտանգի մասին։
Այս ամենը հաշվի առնելով՝ Ազգային-ժողովրդավարական բևեռը (ԱԺԲ) մեծ ջանքեր է գործադրում Վաշինգտոնում՝ փորձելով միջազգային հանրության ուշադրությունը հրավիրել իրավիճակի լրջության վրա։
Կարդացեք նաև
ԱԺԲ-ն անցյալ տարվա նոյեմբերին ԱՄՆ Կոնգրեսում կազմակերպել էր քննարկումներ ԱՄՆ օրենսդիրների հետ՝ հատկապես ընդգծելով հարձակումները ՀԱՍԵ-ի դեմ և խղճի ազատության ոտնահարումները Հայաստանում։
Հաջորդ ամսին ԱԺԲ խորհրդի անդամներ Արա Պապյանը և Ժիրայր Սեֆիլյանը նամակ են հղել Թրամփի վարչակազմին, Կոնգրեսի անդամներին և Եվրոպական հանձնաժողովի նախագահին՝ անդրադառնալով Հայաստանի կառավարության կողմից մարդու իրավունքների խախտումներին։
ԱԺԲ-ն արձանագրում է, որ իշխանությունների գործողությունները վերածվել են համակարգային ճնշման քաղաքականության, որի հիմնական թիրախներից մեկը Հայ առաքելական սուրբ եկեղեցին է։ Հոգևորականների ձերբակալությունները և եկեղեցու նկատմամբ ճնշումները գնահատվում են որպես հարված ազգային ինքնության հիմքերին։
Չնայած այս ահազանգերին՝ ԱՄՆ արձագանքը մնում է թույլ։ Ըստ Արա Պապյանի՝ Վաշինգտոնը շարունակում է աջակցել գործող իշխանություններին՝ առաջնորդվելով զուտ աշխարհաքաղաքական շահերով, նույնիսկ եթե դա տեղի է ունենում ժողովրդավարության և մարդու իրավունքների հաշվին։
Միևնույն ժամանակ TRIPP միջանցքի նախաձեռնությունը ներկայացվում է որպես տնտեսական հաջող նախագիծ, սակայն իրականում այն կարող է խորացնել Հայաստանի կախվածությունը արտաքին կենտրոններից՝ առանց հանրային հստակ հաշվետվողականության։
Եզրափակում․ Հայաստանում ընթացող զարգացումները այլևս միայն ներքին հարց չեն․ դրանք վերածվում են միջազգային քաղաքական խնդրի, որտեղ բախվում են ժողովրդավարության, ինքնության և աշխարհաքաղաքական շահերի հարցերը։
