«Պետք է նաև զբաղվենք դերերի ավանդական ձևախեղման խնդրով, որ անպայման կինը տանը պետք է լինի և չաշխատի, և եթե աշխատում է, ուրեմն իրեն պետք է տալ ընդամենը նվազագույն աշխատավարձ։ Կներեք, բայց ընտանիքներից էլ եմ դա լսում։ Տղամարդիկ ասում են՝ կլինի՞ կնոջս համար մի գործ ճարես, ընդամենը նվազագույն աշխատավարձ ստանա, տնից դուրս գա։ Դա էլ է ինձ համար շատ վիրավորական, թեև իմ կինը չէ, իր կինն է։ Ի՞նչ է նշանակում՝ տնից դուրս գա»,- ԱԺ Աշխատանքի և սոցիալական հարցերի մշտական հանձնաժողովի նիստի ընթացքում այսպիսի մտահոգություն հայտնեց ՀՀ աշխատանքի և սոցիալական հարցերի նախարար Արսեն Թորոսյանը։
Արսեն Թորոսյանը վստահեցրեց՝ կինը հաճախ շատ ավելի մեծ արժեք է ստեղծում, քան տղամարդիկ․ «Այստեղ խոսքը նաև այսպես կոչված խնամքի տնտեսության մասին է։ Կինը, տանը լինելով, արդեն աշխատում է․ խնամում է երեխաներին, եթե հիվանդ ընտանիքի անդամներ կան, խնամում է նրանց, տարեցներին, իր ամուսնուն։ Հիմա աշխարհում միտում կա, որ դա նաև ֆինանսապես է գնահատվում, թե ինչքան արժի տնտեսության համար, քանի որ, եթե դա չարվեր կնոջ կողմից, ինչ-որ մեկը պիտի աներ, կամ էլ արժեք պետք է կորեր տնտեսությունից»։
Ըստ Արսեն Թորոսյանի՝ գենդերային խնդիրները սկսվում են հղիության՝ սեռով պայմանավորված ընդհատումից, երբ խոսքը աղջիկ երեխայի մասին է․ «Մենք կանանց դերի բարձրացմամբ՝ որևէ խտրականություն չդնելով, բոլոր ոլորտներում պետք է զբաղվենք»։
Կարդացեք նաև
Հանձնաժողովի նիստն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
