«Բոլորն ուզում են երաշխավորված խաղաղությունը, շատերը հասկանում են, որ այդ խաղաղությունը մուրալով չի լինելու, հասկանում են՝ դրա համար ջանք ու զոհողություն է պետք, բայց նաև մի վերապահումով, որ իրենցից որևէ մեկը դրա մեջ պիտի չլինի։ Քչերն են պատրաստ այդ հարցում ունենալ սեփական ներդրումը, իրենց ենթարկել ռիսկերի ու դուրս գալ կոմֆորտ վիճակից»,- այսօր «Կյանքը հունիսի 7-ից հետո» թեմայով պանելային քննարկման ժամանակ ասաց «Հայաքվե» ազգային-քաղաքական միավորման անդամ Մենուա Սողոմոնյանը։
Ըստ նրա՝ իշխանությունները գործում են ոչ ավանդական, ոչ գծային կանոններով՝ ի տարբերություն ընդդիմության․ «Այո՛, մենք փորձում ենք ստանդարտ վերաբերել իրավիճակներին, և եթե հարցը այն էր՝ ինչ երկիր ենք ունենալու հունիսի 8-ին, կանխատեսում անելը բարդ է, այն առումով, որ այս ընտրությունների պարագայում մեզ ասում էին՝ ռացիոնալ ընտրություններ են լինելու, պետք է աշխատել առանձին սեգմենտների, տրամադրությունների հետ կապված։ Երբեմն նույնիսկ հաջողվում է օրակարգ այդ առումով գեներացնել, բայց քանի որ իշխանության ձեռքին շատ լծակներ կան, կարողանում են ջրել այդ ամեն ինչը»։
Մենուա Սողոմոնյանի խոսքով՝ եթե հունիսի 7-ին հաղթի գործող վարչախումբը, դրանից հետո ամեն ինչ անելու են՝ որակական մեծամասնություն ունենան ԱԺ-ում ու սկսեն աննախադեպ մարդաորս ընդդիմության ներկայացուցիչների նկատմամբ։ Ըստ Սողոմոնյանի՝ հիմիկվանից ընդդիմությունն իր նախընտրական ցուցակները կազմելիս պետք է ցուցակներում ներգրավի ձիգ մարդկանց․ «Գործող ԱԺ-ի պարագայում նման երևույթների ականատես եղանք, մարդաորսությունը հաջողվեց»։
Կարդացեք նաև
Արփինե ՍԻՄՈՆՅԱՆ
