Անկախ դիտորդ դաշինքի երկարաժամկետ դիտարկման ամփոփում (առ 29.03.2026)
«Անկախ դիտորդ» դաշինքը ներկայացնում է մարտի 9-ից մեկնարկած երկարաժամկետ դիտորդության արդյունքները։ Ստորև ներկայացված են դիտարկման առանցքային կետերն ու արձանագրված փաստերը․
Դիտարկման շրջանակը
Դաշինքն իրականացրել է 6 կուսակցությունների համագումարների, 18 հավաքների դիտարկում, 51 զրույց մասնակիցների հետ, հարցազրույցներ 13 կուսակցությունների 29 ներկայացուցիչների և 27 ՀԿ-ների հետ, ինչպես նաև այցեր 63 կուսակցական գրասենյակներ։
Կարդացեք նաև
Իրավական պարզաբանում
Մինչև մայիսի 8-ը իրականացվող քարոզչությունն օրենքով արգելված չէ, սակայն չկարգավորվող է։ Կուսակցությունների մի մասի մոտ առկա է թյուրընկալում, թե այն արգելված է։ Մայիսի 8-ից ընտրություններին անմիջապես նախորդող ժամանակահատվածում կուսակցությունների քարոզչական գործողությունները և ծախսերը կարգավորվելու են։
Հիմնական արձանագրումները
🔹Վարչական ռեսուրսի կիրառում. կան մտահոգություններ իշխող «Քաղաքացիական պայմանագիր» կուսակցության կողմից սոցիալական վճարների աճի քաղաքականության և համայնքային հիմնարկներից հնարավոր քաղաքական հիմքով աշխատանքից ազատումների վերաբերյալ։
🔹Խոչընդոտներ և ճնշումներ. ահազանգեր են ստացվել «Միասնության թևեր» կուսակցության գրասենյակների վարձակալության խնդիրների, ինչպես նաև ՌԴ-ում հայ գործարարների և նրանց աշխատակիցների առաջիկա ընտրությունների քվեարկությանը մասնակցելու պարտադրելու նպատակով ճնշումների մասին։
🔹Ընտրակաշառք և պարտադրանք. արձանագրվել են «Ուժեղ Հայաստան» կուսակցության օգտին ընտրակաշառքի բաժանման և հավաքներին աշխատակիցների ներգրավման դեպքեր, որոնք արդեն իսկ իրավապահների ուշադրության կենտրոնում են։
🔹Իրավապահների գործելաոճ. մտահոգիչ են հավաքների մասնակիցների և ոստիկանության միջև լարվածության դեպքերը, ինչպես նաև քաղաքական ակտիվիստների հնարավոր մեկուսացումը քննչական գործիքակազմի կիրառմամբ։
🔹Քարոզչական խոսույթ. դիտարկվում է «պատերազմի շահարկման» թեզի կիրառումը թե՛ իշխանական, թե՛ ընդդիմադիր որոշ ուժերի կողմից, ինչը բացասաբար է անդրադառնում քաղաքական քաղաքակիրթ մշակույթի և ընտրողների կամքի ձևավորման վրա։
🔹Արձանագրվել են երկու մեկուսի դեպքեր՝ քաղաքական քարոզչություն իրականացնելու իրավունք չունեցող սուբյեկտների կողմից։
Դաշինքը շարունակում է հետևել գործընթացներին։
Դիտարկման արդյունքներին ավելի մանրամասն կարող եք ծանոթանալ՝ այստեղ
