Այսօր վաղ առավոտից պարտադիր զինվորական ծառայություն անցնող զինծառայողների ծնողները բողոքի ակցիա են անցկացնում պաշտպանության նախարարության շենքի դիմաց: Ծնողներից մեկը՝ Թեհմինե Ալեքսանյանը, լրագրողներին ասաց, որ ոչ թե բողոքում են, այլ մարդասիրական նպատակներով ՊՆ նախարարի ուշադրությունն են ուզում հրավիրել իրենց ցանկության վրա:
Ծնողները պահանջում են, որ բանակում ծառայող իրենց որդիների վրա նույնպես տարածվի 1.5 տարի զինծառայություն անցնելու դրույթը:
«Մեկը իմ տղան գնացել է 2025 թվականի հուլիսի 2-ին, բայց իր դասընկերները գնացել են այս տարի: Նույն դասարանում են սովորել, նույն տարիքի են: Ինչո՞ւ իմ տղան ավելի երկար ծառայի: Կխնդրեի՝ բոլորիս համար էլ նույնը գործի, հավասարություն լինի: Չանտեսեն մեր խնդրանքը: Մենք լսել ենք, որ փոփոխություններ չեն ուզում անել, բայց եթե նախարարը գիտակցի, մի փորք մտածի՝ կտեսնի, որ հավասարություն է պետք, թող չասեն կտրուկ՝ փոփոխություն չի լինելու, այլ տղաների մասին մտածեն»,- ասաց ծնողներից մեկը:
Լրագրողի դիտարկմանը, թե պարտադիր ժամկետային ծառայությունը 1,5 տարի դարձնելը նախընտրական քայլ էր, ծնողներից մեկը այսպես արձագանքեց. «Մենք ընտրությունների հետ չենք կապում: Այս հարցը եղել է շատ վաղուց, դիմել եք նախարարություն, Նիկոլ Փաշինյանին մոտ 4 ամիս առաջ, սպասել պատասխանի, երբ պատասխան չենք ստացել, եկել ենք նախարարություն: Մենք, միեւնույն է, ընտրելու ենք, մեր պարտքն է ընտրելը: Մենք այստեղ պայքարում ենք մեր զինվորի համար»:
Կարդացեք նաև
Ծնողները սպասում են նախարարության ներկայացուցչի հետ հանդիպմանը, զրուցելու: Հարցին՝ եթե չընդառաջեն իրենց խնդրանքին, ի՞նչ են անելու, ծնողներից Թեհմինե Ալեքսանյանն ասաց. «Մենք չենք եկել կռվելու, եկել ենք պահանջելու ու խնդրելու հավասարություն»:
Արփինե ՍԻՄՈՆՅԱՆ
