Արցախի հանրային խորհրդի կազմակերպած արցախցիների նկատմամբ ատելության խոսքի եւ խտրական վերաբերմունքի դրսեւորումների թեմայով պանելային քննարկման ժամանակ Արցախի ՄԻՊ Գեղամ Ստեփանյանն անդրադարձավ հարցին, որ արցախցիների նոր անձնագրերում ծննդյան վայրը նշում են «Ադրբեջան»։
«Օրենքի շրջանակներում կարող են նշել պետություն, քաղաք, բնակավայր, որտեղ մարդը ծնվել է։ Ուղղակի ուզում եմ որպես իրազեկում մեր քաղաքացիներին ասել՝ պահանջեք, որ ձեր ծննդականի մեջ նշված ցանկացած տեղանուն նշեն։ Եթե, օրինակ, իմ պարագայում նշված է Ստեփանակերտ, Լեռնային Ղարաբաղի Ինքնավար մարզ, Ադրբեջանի խորհրդային հանրապետություն, իրենք կարող են նշել եւ Ադրբեջան, եւ ԼՂԻՄ, եւ Ստեփանակերտ։ Մենք պետք է պահանջենք, որ չեմ ուզում անձնագրումս Ադրբեջան նշվի, ուզում եմ Ստեփանակերտ նշվի։ Իրենք պարտավոր են դա անել, որովհետեւ օրենքը թույլ է տալիս՝ ծննդականում նշված ցանկացած տեղանուն կարող է տեղափոխվել անձնագրի մեջ»,- ասաց Գեղամ Ստեփանյանը։
Նրա խոսքով՝ վերջին տվյալներով՝ ՀՀ քաղաքացիություն է ստացել 35 հազար արցախցի։ Նրանցից 12 հազարը անչափահասներ են, որոնք ոչ թե դիմել ու ստացել են, այլ իրենց ծնողների քաղաքացիություն ստանալու հանգամանքով պայմանավորված՝ դարձել են ՀՀ քաղաքացիներ։
Կարդացեք նաև
Ռոզա ՀՈՎՀԱՆՆԻՍՅԱՆ
