«Անընդունելի է սեփական հավակնությունների պատճառով տապալել երկրի համար կարեւոր նախագծեր։ Մեկի հետ անձնական խնդիր ունենաս, պետության համար կարեւոր նախագիծը տապալես, հետո գլուխ գովես, թե Սարգսյան Հայկին տապալեցի, բայց չես ասում, որ զորքիդ թիվը նվազում է։ Մեկումեջ էլ ասում են՝ Սարգսյան Հայկն իր փիառի համար է անում։ Փիառ լիներ, 50 տարի կլինեի խմբակցության պատգամավոր»,- լրագրողների հետ ճեպազրույցում վրդովվեց ՔՊ խմբակցության պատգամավոր Հայկ Սարգսյանը։
Ինչպես արդեն տեղեկացրել ենք, նրա հեղինակած «զինծառայությունից գումարով ազատվելու մասին» նախագիծը մերժվեց ՀՀ ԱԺ Պաշտպանության եւ անվտանգության հարցերի մշտական հանձնաժողովում։
Նա ներկայացրեց, որ Անդրանիկ Քոչարյանը, փաստացի դեմ գնալով վարչապետին, իր սեփական հավակնությունների պատճառով տապալել է նախագիծը։ Հայկ Սարգսյանը պատմեց՝ սկզբում ասել է, թե կգնա ԱՄՆ, կգա, հանձնաժողովի նիստ կանեն, նախագիծ կանցկացնեն, սակայն իրականում տապալել է։
Հայկ Սարգսյանը նաև լրագրողներին պատմեց՝ երբ խնդիր է բարձրացնում, հարաբերություններ են փչանում, բայց ինքը դա անում է հանուն մեր երկրի․ «Հարաբերություններ են փչանում նախարարների հետ, գործադիրի հետ, երբ խնդիրների մասին խոսում եմ։ Երկու տարի ասում եմ՝ բանակում զորքը շաբաթը մեկ է լողանում, հնարավորություն ստեղծենք, թող ամեն օր լողանան։ Երկու տարի անցել է, նույն վիճակն է։ Մեր տղերքը շաբաթը մեկ են լողանում, դե թող ՊՆ ղեկավար կազմում էլ շաբաթը մեկ լողանան, տեսնեմ՝ կարա՞ն․ բա մեր զորքի համար ինչի՞ մենք լավ պայմաններ չպիտի ստեղծենք»։
Կարդացեք նաև
Ճեպազրույցն ամբողջությամբ՝ տեսանութում
Տաթև ՀԱՐՈՒԹՅՈՒՆՅԱՆ
