«Հայկ Սարգսյանը սիրում է ֆանտազիային «զոռ տալ»»,-լրագրողների հետ ճեպազրույցում հայտարարեց ՀՀ ԱԺ Պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը՝ անդրադառնալով ՔՊ խմբակցության պատգամավոր Հայկ Սարգսյանի այն հայտարարություններին, որ Անդրանիկ Քոչարյանն իր հավակնությունների պատճառով դեմ է քվեարկել կարևոր նախաձեռնությանը՝ մասնավորապես իր կողմից շրջանառած «զինծառայությունից գումարով ազատվելու» նախագծին։
Անդրանիկ Քոչարյանն ասաց՝ առաջին անգամ է տեսնում, որ մի մարդ իր նախաձեռնությանը դեմ քվեարկեր․ «Ի՞նչն էր կարևոր՝ բանակից փողով ազատվե՞լը։ Բնականաաբար, պետք է դեմ լինեի փողով բանակից ազատվելուց»։
Հարցին՝ հնարավո՞ր է ՀԱՊԿ-ից դուրս գալու որոշում կայացվի, Անդրանիկ Քոչարյանը պատասխանեց․ «Աշխարհը շատ անհանգիստ է։ Միայն ՀԱՊԿ-ի խնդիրը չէ, մեր երկրի շահը պետք է թելադրի մեր քայլերի հաջորդականությունը։ Մոսկվայում քննարկման ժամանակ ՀԱՊԿ-ի գործողությունները փորձ էր արվում կապել ԼՂ-ի հետ, բայց մեր խնդիրն առաջացել է ՀՀ սահմաններում տիրող իրավիճակի հետ կապված, որ ՀԱՊԿ-ն իր պարտավորությունը չկատարեց»։
Կարդացեք նաև
Լրագրողները հետաքրքրվեցին՝ ինչպե՞ս կարող են 44-օրյա պատերազմում զոհված զինծառայողների ծնողները ծանոթանալ 44-օրյա պատերազմի վերաբերյալ զեկույցին։ Անդրանիկ Քոչարյանն ասաց, որ նրանք իրավասու չեն այդ զեկույցին ծանոթանալու ու նշեց․ «Զեկույցը տվել է եզրակացություն, թե մեր պարտությունը որտեղ պետք է փնտրենք, որտեղ ենք թերացել»։
Տաթև ՀԱՐՈՒԹՅՈՒՆՅԱՆ
