«Ես զինվորների լողանալու հարցով ի պաշտոնե չեմ զբաղվում։ ՊՆ-ում համակարգման ոլորտներ կան, որոնցից տեղյակ չեմ, տեղյակ չեմ՝ որ զինվորը երբ է լողանում։ Տեղյակ չեմ՝ ինչի մասին է խոսքը, կարծում եմ՝ մենք չլողացած զինվոր չունենք։ Դրանք զինվորական կարգապահության խնդիրներ են»,-լրագրողների հարցին՝ ինչո՞ւ են զինվորները շաբաթը մեկ անգամ լողանում, ինչպես ՔՊ-ական Հայկ Սարգսյանն է ահազանգում, լրագրողների հետ ճեպազրույցում այսպես պատասխանեց ՊՆ փոխնախարար Արման Սարգսյանը։
Նաև հետաքրքրվեցին՝ ՌԴ-ից հնչող սպառնալիքների ֆոնին ՀՀ-ն քննարկո՞ւմ է ՀԱՊԿ-ից դուրս գալու հարցը, ի պատասխան Արման Սարգսյանն ասաց՝ այդ հարցի հասցեատերը ես չեմ։
Հարցին՝ որպես նախկին ոստիկանապետ՝ Ձեզ համար ընդունելի՞ է, որ 18-ամյա երիտասարդին գետնին տապալելով բերման են ենթարկում, ՊՆ փոխնախարարը պատասխանեց․ «Ես չգիտեմ՝ ինչի մասին է խոսքը։ Իրականում չեմ տեսել, չգիտեմ՝ ինչքանով են իրավաչափ գործողությունները, բայց մի բան գիտեմ՝ ոստիկանությունը նաև ֆիզիկական ուժ գործադրելու՝ օրենքով ընձեռնված իրավունք ունի»։
Կարդացեք նաև
Հարցին՝ հերքո՞ւմ եք, որ օկուպացված ՀՀ տարածքներում Ադրբեջանը հաստատվում է, ենթակառուցվածքներ դնում, ի պատասխան Արման Սարգսյանը հորդորեց հետևել և հիմք ընդունել ՊՆ-ի մամուլի խոսնակի պարզաբանումները․ «Դա հիմք ընդունեք, ոչ թե սիրողական հայտարարությունները»։ Լրագրողների դիտարկմանը՝ տեսանյութեր և քարտեզներ են հրապարակվում, ՊՆ փոխնախարարն արձագանքեց․ «Քարտեզներ բոլորս էլ կարող ենք ունենալ՝ իմ երեխաներն էլ, ձեր հարևաններն էլ»։
ԱԺ ճեպազրույցներն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
