«Մենք ունեցել ենք ջերմ, ընկերական հարաբերություններ մինչև 2018-ի մայիս ամիս, երբ վարչապետը դարձել է վարչապետ։ Ես իրեն համարել եմ իմ ավագ եղբայր, հարազատ եղբայր։ Վարչապետ դառնալուց հետո այդ հարաբերությունը չի կարող շարունակվել։ Եթե դու չես կարող քո ընկերոջն ամեն րոպե զանգել, կապը կորչում է, և ընկերությունը չի շարունակվում»,- լրագրողների հետ ճեպազրույցում, ի պատասխան այն դիտարկմանը՝ թե ՀՀ վարչապետ Նիկոլ Փաշինյանն իր մասին կոշտ է արտահայտվում, այսպես պատասխանեց ՔՊ խմբակցության պատգամավոր Հայկ Սարգսյանը։
Լուսանկարը՝ 2018թ.
Ըստ պատգամավորի՝ այն, որ իրենց ընկերական հարաբերությունները չեն շարունակվում, բնական է․ «Եթե առաջիկա 10-30 տարվա ընթացքում կլինի իրավիճակ, երբ Նիկոլ Փաշինյանը չի լինի վարչապետ, մենք էլի կլինենք ընկերներ։ Այժմ մեր ընկերությունը փաստացի չի շարունակվում»։
Հիշեցնենք, որ անդրադառնալով Հայկ Սարգսյանին ՔՊ նախընտրական ցուցակում չընդգրկելու մասին հարցին, Նիկոլ Փաշինյանն ասել էր. «Ես չեմ կարծում, որ այդ քննարկումների բովանդակությունը հանրային դարձնելուն ուղղված գործողությունները բխում են պարոն Սարգսյանի շահերից։ ՔՊ վարչության նիստի ժամանակ ամիսներ առաջ խիստ նկատողություն է հայտարարվել պարոն Սարգսյանին, դա ունեցել է կոնկրետ պատճառ, որին հետևել են իրավական գործընթացներ։ Այդ պատմությունն ընդամենը մեկ բանի մասին է, որ ՔՊ-ն իր անդամների ոչ կանոնավոր, կոռուպցիոն տեսանկյունից խնդրահարույց գործողությունները չի հանդուրժելու։ Սա պետք է պարզ լինի բոլորի համար»:
Կարդացեք նաև
Այս առիթով պատգամավորն ասաց․ «Անցել են ամիսներ, իմ նկատմամբ քրեական գործ չկա, չի էլ կարող հարուցվել: Եթե լինի, պետք է լինի հնարովի գործ։ Հույս ունեմ, որ նման բան լինել չի կարող»։ Հայկ Սարգսյանն ասաց, որ Նիկոլ Փաշինյանի հետ առանձին հանդիպում չի ունեցել։
Լրագրողները փաստեցին՝ ԱԺ ՀՀ ԱԺ Պաշտպանության եւ անվտանգության հարցերի մշտական հանձնաժողովի նիստում հայտարարեցիք, թե փակ նիստում ձեզ ասել են՝ վարչապետ ես բերում մեզ վրա, և հետաքրքրվեցին՝ ովքե՞ր էին ասողները, Հայկ Սարգսյանը պատասխանեց․ «Ինչ եղել է փակ նիստում, թող մնա փակ նիստում։ Պետք էր ասել, որ նման վերնագրերի տեղիք չտար, որ մարդիկ չասեին՝ Հայկ Սարգսյանը դուրս է եկել Նիկոլ Փաշինյանի դեմ, ինտրիգներ սարքեին»։
Հայկ Սարգսյանի ճեպազրույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
