«Մենք դա ոչ ողջունում ենք, ոչ քննադատում․ բովանդակության հետ համաձայն ենք, ժամկետների հետ՝ ոչ։ Մենք ասում ենք՝ դա կամ շուտ պետք է արվեր, կամ ընտրություններից հետո»,- խորհրդարանում, լրագրողների հետ ճեպազրույցում ասաց «Իրազեկ քաղաքացիների միավորում» հասարակական կազմակերպության նախագահ Դանիել Իոաննիսյանը՝ անդրադառնալով խորհրդարանում այսօր քննարկվող Ընտրական օրենսգրքի փոփոխությանը։
Հիշեցնենք, իշխող ուժը խորհրդարանի արտահերթ նիստում եւ արտակարգ ռեժիմով ԸՕ-ի փոփոխություններ է ներկայացրել, ըստ որի, կուսակցությունների դաշինքի անվանումը չի կարող պարունակել անձնանուն, պետական եւ տեղական ինքնակառավարման մարմինների անուններ կամ դրանց շփոթելու աստիճան նման անվանումներ կամ դրանց հոլովաձեւեր։ Առաջարկվում է սահմանել, որ կուսակցությունների դաշինքի անվանումը չի կարող պարունակել վիրավորական կամ զրպարտչական բնույթի բառեր կամ այլ արտահայտություններ։
Ընդդիմադիր քաղաքական ուժերը մտահոգություններ ունեն, որ փոփոխությունը ուղղված է «Ուժեղ Հայաստան Սամվել Կարապետյանի հետ» դաշինքի գործունեությունը սահմանափակելուն։
«Մենք Հայաստանում ունեցել ենք շատ դեպքեր, թե հեղափոխությունից առաջ, թե հեղափոխությունից հետո, երբ ԸՕ-ն փոխվել է շատ ավելի կարճ ժամկետներում։ Նույնիսկ դեպք ենք ունեցել, երբ ընտրակարգ է փոխվել ընտրություններից 60-70 օր առաջ, եթե հիշողությունս չի դավաճանում»,- ասաց Դանիել Իոաննիսյանը։
Կարդացեք նաև
Նելլի ԳՐԻԳՈՐՅԱՆ
